Gollivud yulduzi Dueyn Jonson hamkasbi Vin Dizel tomonidan “Forsaj” filmlari seriyasini suratga olish chog‘ida yuzaga kelgan kelishmovchiliklar to‘g‘risidagi bayonotiga izoh berdi. Aktyor bu haqda The Hollywood Reporter nashriga bergan intervyusida to‘xtalib o‘tgan, deb xabar beradi “Korrespondent.net”.
Dizel va Jonson o‘rtasidagi kelishmovchilik yuzaga kelgani to‘g‘risidan mish-mishlar anchadan buyon bor, biroq aktyorlarning hech biri bunga izoh bermay kelayotgan edi.
Iyun oyida Dizel Men’s Health jurnaliga Jonson bilan o‘rtasidagi keng reklama qilingan “dushmanlik”ni aslida prodyuser sifatida ataylab amalga oshirganini bildirgandi. Shu orqali Vin Dueyn bilan mojarosi ekranda tabiiy chiqishiga urinmoqchi bo‘lgan.
Jonson esa hamkasbining so‘zlarini kulib qabul qilib, “Forsaj” franshizasida boshqa suratga tushmasligini ma’lum qilgan.
“Men kuldim, juda qattiq kuldim. Menimcha, ushbu gaplarga ko‘pchilik yaxshigina kulgan bo‘lsa kerak. Va bu haqida boshqa hech narsa gapirmayman. Men ularga eng yaxshi tilaklarimni bildirib bo‘lganman. ‘Forsaj-9’da muvaffaqiyat tilaganman. Shuningdek, filmning men suratga tushmaydigan 10 va 11-qismlarida ham, bundan tashqari, ‘Forsaj’ning boshqa filmlarida ham omad tilayman”, — deydi aktyor.
Avvalroq “Forsaj-9” AQShdagi uch kunlik prokatida 70 mln dollar to‘plab, rekord o‘rnatgani, “Forsaj” franshizasi 11-filmdan so‘ng yakunlanishi to‘g‘risida xabar berilgandi.
Izoh (0)