Голливуд юлдузи Дуэйн Жонсон ҳамкасби Вин Дизель томонидан «Форсаж» фильмлари сериясини суратга олиш чоғида юзага келган келишмовчиликлар тўғрисидаги баёнотига изоҳ берди. Актёр бу ҳақда The Hollywood Reporter нашрига берган интервьюсида тўхталиб ўтган, деб хабар беради «Korrespondent.net».
Дизель ва Жонсон ўртасидаги келишмовчилик юзага келгани тўғрисидан миш-мишлар анчадан буён бор, бироқ актёрларнинг ҳеч бири бунга изоҳ бермай келаётган эди.
Июнь ойида Дизель Men’s Health журналига Жонсон билан ўртасидаги кенг реклама қилинган «душманлик»ни аслида продюсер сифатида атайлаб амалга оширганини билдирганди. Шу орқали Вин Дуэйн билан можароси экранда табиий чиқишига уринмоқчи бўлган.
Жонсон эса ҳамкасбининг сўзларини кулиб қабул қилиб, «Форсаж» франшизасида бошқа суратга тушмаслигини маълум қилган.
«Мен кулдим, жуда қаттиқ кулдим. Менимча, ушбу гапларга кўпчилик яхшигина кулган бўлса керак. Ва бу ҳақида бошқа ҳеч нарса гапирмайман. Мен уларга энг яхши тилакларимни билдириб бўлганман. ‘Форсаж-9’да муваффақият тилаганман. Шунингдек, фильмнинг мен суратга тушмайдиган 10 ва 11-қисмларида ҳам, бундан ташқари, ‘Форсаж’нинг бошқа фильмларида ҳам омад тилайман», — дейди актёр.
Аввалроқ «Форсаж-9» АҚШдаги уч кунлик прокатида 70 млн доллар тўплаб, рекорд ўрнатгани, «Форсаж» франшизаси 11-фильмдан сўнг якунланиши тўғрисида хабар берилганди.
Изоҳ (0)