Pegasus josuslik dasturi orqali kuzatish uchun tanlangan telefon raqamlar ro‘yxatiga Fransiya prezidenti Emmanuel Makronning raqamlaridan biri ham kiritilgan. Bu haqda Fransiyaning Le Monde nashri xabar berdi.
Xabarga ko‘ra, 2017-yildan beri Makronning raqami Pegasus dasturi yordamida potensial xakerlik uchun Marokash razvedka xizmati tomonidan tanlangan telefon raqamlari ro‘yxatida bo‘lib kelgan. Shuningdek, ehtimoliy nishonlar ro‘yxatiga Fransiyaning sobiq bosh vaziri Eduard Filipp va yana 14 vazirning raqamlari kiritilgan. Mazkur raqamlarning barchasi haqiqatan ham buzilganmi yoki yo‘qligi ma’lum emas, deb yozadi Le Monde.
Fransiya prezidentining rasmiy qarorgohi bo‘lgan Yelisey saroyining Le Monde’ga bergan intervyusida ta’kidlanishicha, agar jurnalistlar keltirgan faktlar rost bo‘lsa, “demak ular juda jiddiy”.
The Washington Post xabariga ko‘ra, Pegasus orqali kuzatish nishonlari orasida 14 ta davlat rahbari bo‘lgan. Makrondan tashqari, bular Janubiy Afrika prezidenti Siril Ramafosa, Iroq prezidenti Barham Solih, Marokash qiroli Muhammad VI, shuningdek, uch nafar amaldagi va yetti nafar sobiq bosh vazirlar. Nishonlar qatoriga JSST raisi Tedros Gebreyesus va Meksikaning sobiq prezidenti Felipe Kalderon ham kiritilgan, deya xabar beradi The Guardian.
Pegasus — bu zararli dastur bo‘lib, u iOS yoki Android qurilmalariga kirib boradi va foydalanuvchiga bildirmasdan xabarlar, fotosuratlar, joylashuv ma’lumotlariga kirish, kamera va mikrofonni faollashtirishga imkon beradi.
Dastur jinoyatchilar va terrorchilarni ta’qib qilish uchun mo‘ljallangan va faqat davlat hokimiyati organlari uchun xizmat qiladi. Biroq bir necha kun oldin jurnalistlar Pegasus’dan siyosatchi va jurnalistlarni ommaviy kuzatish uchun foydalanilganini aniqladi.
Izoh (0)