Afg‘onistonning Pokistondagi elchisi va yuqori martabali diplomatlari Kobulga chaqirildi. Bu haqda Afg‘oniston Tashqi ishlar vazirligiga tayanib, “Interfaks” xabar berdi.
“Pokistondagi Afg‘oniston elchisining qizi o‘g‘irlab ketilgandan so‘ng Islom Respublikasi rahbariyati elchini va yuqori martabali diplomatlarni Kobulga chaqirdi”, — deyiladi Afg‘oniston TIV bayonotida.
Ta’kidlanishicha, yaqin kelajakda Afg‘oniston delegatsiyasi “o‘g‘irlash ishi va unga tegishli masalalar bo‘yicha tekshiruv o‘tkazish va choralar ko‘rish uchun Pokistonga tashrif buyurishni rejalashtirmoqda. Yakuniy qaror delegatsiyaning xulosalari asosida qabul qilinadi”.
Pokiston Tashqi ishlar vazirligi Afg‘onistonning o‘z elchisini qaytarish to‘g‘risidagi qaroridan afsusda va uning qayta ko‘rib chiqilishiga umid qilmoqda.
“Pokiston TIV Afg‘oniston hukumatining Pokistondan o‘z elchisi va yuqori martabali diplomatlarini olib ketish to‘g‘risidagi qarori achinarli va qayg‘uli ekanini bildirdi”, — deb yozadi Pokistonning Afg‘onistondagi elchisi Mansur Ahmad Xon Twitter’da.
Uning ta’kidlashicha, “Islomobodda elchining qizi o‘g‘irlangani va qiynoqqa solingani to‘g‘risidagi xabarlar tekshirilmoqda va bosh vazir ko‘rsatmasi bilan yuqori darajada kuzatilmoqda”.
Mansur Ahmad Xonning qo‘shimcha qilishicha, “elchi, uning oilasi hamda Afg‘onistonning Pokistondagi elchixonasi va konsulxonalari xodimlarining xavfsizligi yanada kuchaytirildi”.
“Tashqi ishlar vaziri Afg‘oniston elchisi bilan uchrashdi, hukumatning ushbu vaziyatda ko‘rgan barcha qadamlarini ta’kidlab o‘tdi va uni to‘laqonli hamkorlikka qayta ishontirdi. Afg‘oniston hukumati qarorini qayta ko‘rib chiqadi deb umid qilamiz”, — dedi Pokistonning Afg‘onistondagi elchisi.
O‘z navbatida, “Tolibon” Islomoboddagi Afg‘oniston elchisining qizi o‘g‘irlab ketilganini qoraladi va Pokiston rasmiylaridan o‘g‘rilarni topib jazolashni talab qildi.
“O‘g‘irlash — bu biz qoralaydigan tajovuz. Bunday harakatlar ikki mamlakat o‘rtasida nafrat paydo qilmasligi uchun biz Pokiston hukumatini jinoyatchilarni hibsga olish va jazolash bo‘yicha harakatlarni kuchaytirishga chaqiramiz,” — deb yozadi “Tolibon” matbuot xizmati kotibi Suhayl Shohin Twitter’da.
Eslatib o‘tamiz, noma’lum shaxslar Pokistondagi Afg‘oniston elchisining qizini o‘g‘irlab ketib, qiynoqqa solgan.
26 yoshli Silsila Alixail 17-iyul, juma kuni velosipedda uyiga qaytayotgan vaqtida o‘g‘irlab ketilgan va besh soatga yaqin “shafqatsizlarcha qiynoqlarga solingan”, deya ma’lum qildi Afg‘oniston Tashqi ishlar vazirligi.
Tibbiy hisobotda aytilishicha, qizning tanasida timdalangan joylar, bilaklari va to‘piqlarida arqon izlari bor, shuningdek, boshining ensa qismida gematoma aniqlangan. Asirlikdan ozod etilgach, qiz kasalxonaga yotqizilgan.
Avvalroq Pokiston bosh vaziri Imron Xon Afg‘onistondagi vaziyat O‘zbekiston va Pokiston uchun judayam tashvishli ekanini qayd etgan edi.
Mavzuga doir:
Izoh (0)