Noma’lum shaxslar Pokistondagi Afg‘oniston elchisining qizini o‘g‘irlab ketib, qiynoqqa soldi, deb xabar bermoqda Reuters Afg‘oniston hukumatiga tayanib.

Foto: Pixabay

26 yoshli Silsila Alixail 17-iyul, juma kuni velosipedda uyiga qaytayotgan vaqtida o‘g‘irlab ketilgan va besh soatga yaqin “shafqatsizlarcha qiynoqlarga solingan”, deya ma’lum qildi Afg‘oniston Tashqi ishlar vazirligi.

Tibbiy hisobotda aytilishicha, qizning tanasida timdalangan joylar, bilaklari va to‘piqlarida arqon izlari bor, shuningdek, boshining ensa qismida gematoma aniqlangan. Asirlikdan ozod etilgach, qiz kasalxonaga yotqizilgan.

Afg‘oniston hukumati ushbu “mudhish xatti-harakat”ni qoralab, diplomatlar, ularning oilalari va boshqa xodimlar xavfsizligi yuzasidan chuqur xavotir bildirdi.

Ikkala mamlakatda ham ushbu holatdan umumiy norozilik fonida Afg‘oniston hukumati rasmiy shikoyat topshirish uchun Pokistonning Kobuldagi elchisini chaqirdi.

Shuningdek, Afg‘oniston TIV Pokiston hukumatini elchixona xavfsizligini ta’minlash uchun barcha choralarni ko‘rishga va o‘g‘rilikda aybdorlarni javobgarlikka tortishga chaqirdi.

Pokiston TIV hodisa yuz berganini tasdiqladi va Islomobod politsiyasi puxta tekshiruv boshlaganini ma’lum qildi. “Pokiston bosh vaziri Imron Xon ushbu masala birinchi darajali topshiriq sifatida ko‘rib chiqilishi va aybdorlar 48 soat ichida qo‘lga olinishini istardi”, — dedi ichki ishlar vaziri Shayx Rashid Ahmad.

Vazirlik xabarida aytilishicha, hukumat elchi va uning oilasi xavfsizligini kuchaytirgan, huquq-tartibot organlari esa aybdorlarni javobgarlikka tortish uchun ularni topishga va qo‘lga olishga urinmoqda.

Avvalroq Pokiston bosh vaziri Imron Xon Afg‘onistondagi vaziyat O‘zbekiston va Pokiston uchun judayam tashvishli ekanini qayd etgan edi.

So‘nggi bir necha haftadan buyon “Tolibon” harakati a’zolari Afg‘oniston hukumat kuchlari pozitsiyalariga hujum boshlab, ko‘plab hududlarni, shu jumladan, Eron, Tojikiston va Turkmaniston bilan chegaradagi postlarni egallab oldi. Bu Amerika qo‘shinlarining Afg‘onistondan olib chiqilishi fonida yuz bermoqda, qo‘shinlarni olib ketish esa AQSh prezidenti Jo Baydenning rejasi bo‘yicha 2021-yil 11-sentabrgacha yakunlanishi kerak.