Қирғизистон Инвестиция вазирлиги матбуот хизмати Туркиянинг Sky Ray Ve Оto Yedek Parça Ekipmanlari Üretim Sanayi A.Ş компанияси Бишкекда монорельс (бир изли ерусти метроси) транспорт тизимини қуриш масаласини ўрганаётгани ҳақида хабар берди. Компания билан ҳамкорлик тўғрисида меморандум имзоланган, деб ёзади Kloop.
Вазирликнинг маълум қилишича, Инвестициялар вазирлиги ва Sky Ray Ve Оto Yedek Parça Ekipmanlari Üretim Sanayi A.Ş ўртасидаги шартномани Қирғизистон президенти Садир Жапаров Туркияга расмий ташрифи чоғида имзолаган.
Ушбу меморандумни амалга ошириш доирасида 12—14 июль кунлари Туркия компаниясининг бошқарув раиси Нежмеддин Генчйилмаз ва компания технолог-муҳандиси Йилай Йилмаз Бишкекка ташриф буюрди. Улар шаҳар транспорт тизимини ва монорельс йўлни ишга тушириш имкониятларини ўрганди.
Шундан сўнг давлат органлари ва муниципалитетларнинг Нежмеддин Генчйилмаз билан ишчи учрашувида лойиҳа батафсил муҳокама қилинди. Йиғилишда инвестициялар вазири Алмамбет Шикмаматов Қирғизистон «турк инвесторлари учун ҳар доим очиқ» эканини таъкидлаб, «лойиҳанинг тезроқ амалга оширилишида ҳар томонлама ёрдам беришга» ваъда берди.
«Вазирлик давлат идоралари билан биргаликда ушбу лойиҳани амалга ошириш устида астойдил ҳаракат қилади», — дейилади баёнотда.
Бишкекда монорельс транспорт тизимини қуриш режалари 2020 йил охирида муҳокама қилинганди.
Пойтахтнинг ўша пайтдаги вице-мэри Азиз Алимқулов 21 декабрь куни «Бишкек монорельс транспорт тизими» лойиҳасини тақдим этган. Унинг сўзларига кўра, бундай тизимнинг афзалликлари — ташиш имконияти, экологик тозалик, қулайлик, интеграция, кўчалардаги тирбандликни камайтириш ва хавфсиз ҳаракатланишдан иборат.
Алимқуловнинг маълум қилишича, режалаштирилган монорельснинг умумий узунлиги 37 километрни ташкил этади, лойиҳага 32 та станция ва иккита линия қурилиши киради. Унинг сўзларига кўра, вагоннинг йўловчи сиғими 150 дан 180 кишигача бўлади, монорельснинг баландлиги эса 5-7 метрни ташкил қилади. Лойиҳани давлат-хусусий шериклиги доирасида амалга ошириш режалаштирилган эди.
Бироқ шаҳар аҳолиси монорельс йўл қуриш режаларига шубҳа билан қараган ва пойтахтда бундай йўл қуриш мумкин эмаслигини таъкидлаган. Скептиклар ўша пайтда Бишкек мэри вазифасини бажарувчиси Балбак Тулобаев томонидан танқид қилинган.
Тулобаев монорельс келажак лойиҳаси эканини айтиб, уни амалга ошириш зарурлигини, қолаверса, Бишкекда монорельс темир йўл қуриш бошқа мамлакатларга қараганда арзонроқ бўлишини таъкидлаган.
Маълумот учун монорельс — рельсли транспортнинг бир тури. Монорельс деганда расман оддийсидан фарқли ўлароқ иккита эмас, битта рельсли темир йўл тушунилса-да, амалда ҳеч қандай рельси бўлмаган йўлдан ташқаридаги транспортнинг турли шакллари назарда тутилади. Одатда ер устида ноанъанавий усулда, яъни иккита таянч рельссиз ҳаракатланадиган эстакада транспортинининг ҳар қандай шакли монорельс дейилади.
Изоҳ (0)