AOKA bo‘lim boshlig‘i Qudratov Javohir Ne’matullayevich 38 yoshida koronavirus oqibatida vafot etdi. Bu haqda agentlik “Daryo”ga xabar qildi.
Ma’lum qilinishicha, Javohir Qudratov Zangiotadagi kovid-markazning jonlantirish bo‘limida yotgan.
Javohir Qudratov 1983-yil 12-noyabrda Shahrisabz tumanida tug‘ilgan. U O‘zbekiston davlat jahon tillari va O‘zbekiston Milliy universitetlarini tamomlagan.
Qudratov Toshkent xalqaro radiosi, Ommaviy kommunikatsiyalar sohasidagi monitoring markazi, “Qashqadaryo” – “Novosti Kashkadari” gazetalari, Bandlik va mehnat munosabatlari vazirligi, Axborot xavfsizligi va jamoat tartibini ta’minlashga ko‘maklashish markazi, Axborot texnologiyalari va kommunikatsiyalarini rivojlantirish vazirligi hamda boshqa tashkilotlarda samarali faoliyat olib borgan.
2019-yildan buyon Axborot va ommaviy kommunikatsiyalar agentligining bo‘lim boshlig‘i sifatida faoliyat ko‘rsatayotgan edi.
Bundan avval Oliy Majlis deputati Abdurahim Qurbonov 47 yoshida koronavirus asoratlaridan vafot etgani, O‘zbekistonning Belarusdagi elchixonasi xodimi koronavirus oqibatida vafot etgani hamda O‘zbekiston xalq artisti Mirza Azizov 58 yoshida vafot etgani haqida xabar berilgandi.
Izoh (0)