Toshkentda 16-iyul kuni bo‘lib o‘tayotgan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya doirasida Shavkat Mirziyoyev Yevropa komissiyasi vitse-prezidenti, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelni qabul qildi.
Pezident matbuot xizmatining xabar berishicha, uchrashuvda ko‘p qirrali O‘zbekiston—YeI hamkorligining dolzarb masalalari muhokama qilindi.
Jozep Borrel davlat rahbariga Yevropa kengashi raisi Sharl Mishel va Yevropa komissiyasi rahbari Ursula fon der Lyayenning salomi, eng ezgu tilaklarini yetkazdi. Shuningdek, O‘zbekiston yetakchisining Markaziy va Janubiy Osiyo bog‘liqligini mustahkamlash borasidagi global tashabbusi muhim ahamiyatga ega va o‘z vaqtida ilgari surilayotganini ta’kidladi.
Uchrashuvda so‘nggi yillarda O‘zbekiston va YeI sherikligi jadal sur’atlar bilan rivojlanib borayotganini mamnuniyat bilan qayd etildi. Ko‘p qirrali hamkorlikni, eng avvalo, inson kapitali va demokratik yangilanishlar, biznes, investitsiya va innovatsiyalarni ilgari surish, “yashil” taraqqiyot, ekologiya, madaniy almashinuv va boshqa yo‘nalishlarda yanada kengaytirish muhim ekani ta’kidlandi. O‘zbekiston va Yevroittifoq o‘rtasida kengaytirilgan sheriklik va hamkorlik to‘g‘risidagi yangi bitim bo‘yicha muzokaralar yakuniga yetayotgani ma’lum qilindi.
Xalqaro kun tartibi yuzasidan ham batafsil fikr almashildi. Afg‘onistonda tinchlik o‘rnatishga ko‘maklashish masalalariga alohida e’tibor qaratildi.
Bundan avval Shavkat Mirziyoyev Toshkentda bo‘lib o‘tayotgan konferensiya doirasida Xitoy tashqi ishlar vazirini qabul qilgani, Afg‘oniston hamda Pokiston prezidenti bilan uchrashgani haqida xabar berilgandi.
Eslatib o‘tamiz, Toshkent shahrida 16-iyul kuni “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusida xalqaro konferensiya o‘z ishini boshladi. Shavkat Mirziyoyev tashabbusi bilan tashkil etilgan anjumanda Afg‘oniston prezidenti, Pokiston bosh vaziri, Markaziy va Janubiy Osiyo davlatlarining tashqi ishlar vazirlari, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etmoqda.
Izoh (0)