Toshkentda 16-iyul kuni bo‘lib o‘tayotgan xalqaro konferensiya doirasida Shavkat Mirziyoyev Hindiston tashqi ishlar vaziri Subramanyam Jayshankarni qabul qildi, deb xabar bermoqda Prezident matbuot xizmati.
Qayd etilishicha, davlat rahbari O‘zbekiston—Hindiston strategik sheriklik va ko‘p qirrali hamkorlik munosabatlari oliy darajadagi muntazam muloqotlar davomida erishilgan kelishuvlarga muvofiq izchil rivojlanib borayotganini mamnuniyat bilan qayd etdi.
Vazir Jayshankar O‘zbekiston yetakchisiga Hindiston bosh vaziri Narendra Modining salomi va samimiy tilaklarini yetkazdi.
O‘zbekistonning Markaziy va Janubiy Osiyo o‘rtasidagi bog‘liqlikni, shuningdek, Afg‘onistonda tinchlikka erishish va ushbu mamlakat iqtisodiyotini tiklashga qaratilgan mintaqaviy loyihalarni ilgari surish borasidagi sa’y-harakatlari yuksak baholandi.
Ikki mamlakat hududlarini faol jalb qilgan holda investitsiyalar, innovatsiyalar, savdo, biznes, logistika, axborot texnologiyalari, sog‘liqni saqlash va boshqa ustuvor yo‘nalishlarda qo‘shma loyihalarni amalga oshirish muhim ekanligi ta’kidlandi.
Mamlakatlar “Hindiston—Markaziy Osiyo” formatidagi samarali muloqotni davom ettirishdan manfaatdor ekanini qayd etdi.
Bundan avval Shavkat Mirziyoyev Toshkentda bo‘lib o‘tayotgan xalqaro konferensiya doirasida Xitoy tashqi ishlar vaziri Van Ini, Rossiya tashqi ishlar vaziri Sergey Lavrovni qabul qilgani haqida xabar berilgan edi.
Davlat rahbari, shuningdek, Afg‘oniston hamda Pokiston prezidenti bilan, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel bilan uchrashdi.
Izoh (0)