Shavkat Mirziyoyev Toshkentda 16-iyul kuni bo‘lib o‘tayotgan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya doirasida Rossiya tashqi ishlar vaziri Sergey Lavrovni qabul qildi.
Prezident matbuot xizmatining xabar berishicha, ikki mamlakat o‘rtasidagi strategik sheriklik munosabatlarini yanada mustahkamlash va ko‘p qirrali hamkorlikni rivojlantirish masalalari muhokama qilindi.
Tashqi ishlar vaziri davlat rahbariga Rossiya prezidenti Vladimir Putinning salomi va eng ezgu tilaklarini yetkazdi.
Bo‘lajak oliy darajadagi sammitga tayyorgarlik ko‘rish, qo‘shma dastur va loyihalarni, eng avvalo, savdo-iqtisodiy va madaniy gumanitar sohalarda ilgari surishga alohida e’tibor qaratildi.
Afg‘onistondagi vaziyat keskinlashishi sharoitida mintaqaviy hamkorlikni rivojlantirish masalasi ko‘rib chiqildi.
Bundan avval Shavkat Mirziyoyev Toshkentda bo‘lib o‘tayotgan xalqaro konferensiya doirasida Xitoy tashqi ishlar vazirini qabul qilgani, O‘zbekiston va Xitoy o‘rtasidagi do‘stlik va har tomonlama strategik sheriklik munosabatlarini yanada mustahkamlashning dolzarb masalalari ko‘rib chiqilgani haqida xabar berilgan edi.
Davlat rahbari, shuningdek, Afg‘oniston hamda Pokiston prezidentlari bilan, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel bilan uchrashdi.
Eslatib o‘tamiz, Shavkat Mirziyoyev tashabbusi bilan tashkil etilgan anjumanda Afg‘oniston prezidenti, Pokiston bosh vaziri, Markaziy va Janubiy Osiyo davlatlarining tashqi ishlar vazirlari, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etmoqda.
Izoh (0)