Toshkent viloyati Ohangaron tumanida joylashgan, umumiy maydoni 1,5 gektar bo‘lgan yer qa’ri uchastkasi sotuvga chiqarildi. Bu haqda “E-auksion”ga tayanib, Spot xabar berdi.
Sotishdan maqsad geologik qidiruv ishlarini olib borish ishlarini amalga oshiruvchi xaridorlarni topishdir. Yer maydonida asosan oltin qidirilishi ko‘zda tutilgan bo‘lib, lotning boshlang‘ich narxi 223 million so‘mni tashkil etadi.
Arizalar iyul oyining 27-sanasiga qadar qabul qilinadi. Savdolar 29-iyulda o‘tkazilishi rejalashtirilmoqda.
Avvalroq Davlat aktivlarini boshqarish agentligi tomonidan Navoiy viloyati Nurota tumanidagi 5 ta yer uchastkasi sotuvga chiqarilgandi. 3—4,5 gektar orasida bo‘lgan uchastkalarning boshlang‘ich narxi 25,7—38,5 million so‘m atrofida.
Ma’lumot uchun, Vazirlar Mahkamasining 2019-yil 16-martdagi 224-sonli qarori bilan Qimmatbaho metallarni oltin izlovchilar usulida qazib olish faoliyatini amalga oshirish tartibi to‘g‘risidagi nizom tasdiqlangan. Unga ko‘ra, Davlat geologiya va mineral resurslar qo‘mitasi yer qa’ri uchastkalarining ro‘yxati tasdiqlanganidan so‘ng 5 kunda auksionni o‘tkazish uchun ma’lumotlarni tayyorlaydi. Auksion o‘tkazish haqidagi xabar auksiondan 5 kun oldin e’lon qilinishi lozim. Auksionda ishtirok etish uchun arizalar “Elektron onlayn auksionlarni tashkil etish markazi”ning veb-saytida qabul qilinadi. Arizachi hisob raqamga yer uchastkasining 5 foizi miqdorida zakalat pulini joylashtirishi kerak.
Izoh (0)