Шавкат Мирзиёев Тошкентда 16 июль куни бўлиб ўтаётган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция доирасида Россия ташқи ишлар вазири Сергей Лавровни қабул қилди.
Президент матбуот хизматининг хабар беришича, икки мамлакат ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни ривожлантириш масалалари муҳокама қилинди.
Ташқи ишлар вазири давлат раҳбарига Россия президенти Владимир Путиннинг саломи ва энг эзгу тилакларини етказди.
Бўлажак олий даражадаги саммитга тайёргарлик кўриш, қўшма дастур ва лойиҳаларни, энг аввало, савдо-иқтисодий ва маданий гуманитар соҳаларда илгари суришга алоҳида эътибор қаратилди.
Афғонистондаги вазият кескинлашиши шароитида минтақавий ҳамкорликни ривожлантириш масаласи кўриб чиқилди.
Бундан аввал Шавкат Мирзиёев Тошкентда бўлиб ўтаётган халқаро конференция доирасида Хитой ташқи ишлар вазирини қабул қилгани, Ўзбекистон ва Хитой ўртасидаги дўстлик ва ҳар томонлама стратегик шериклик муносабатларини янада мустаҳкамлашнинг долзарб масалалари кўриб чиқилгани ҳақида хабар берилган эди.
Давлат раҳбари, шунингдек, Афғонистон ҳамда Покистон президентлари билан, Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел билан учрашди.
Эслатиб ўтамиз, Шавкат Мирзиёев ташаббуси билан ташкил этилган анжуманда Афғонистон президенти, Покистон бош вазири, Марказий ва Жанубий Осиё давлатларининг ташқи ишлар вазирлари, жами 44 та мамлакат ва 30 га яқин халқаро ташкилот делегациялари, нуфузли хорижий илмий-тадқиқот ва таҳлил марказлари раҳбарлари иштирок этмоқда.
Изоҳ (0)