Mimar Group qurilish kompaniyasi va Toshkent arxitektura-qurilish instituti qurilish sohasidagi yosh mutaxassislarni tayyorlash hamda ularning kasbiy o‘sishiga ko‘maklashish masalasida kelishuvga erishildi.
Mimar Group qurilish kompaniyasi malakali kadrlarni yanada jalb qilish maqsadida, O‘zbekistondagi yetakchi oliy ta’lim muassasalari bilan hamkorlik aloqalarini o‘rnatishda davom etmoqda. 2021-yilning 7-iyul kuni Mimar Group kompaniyasi va Toshkent arxitektura-qurilish instituti o‘rtasida hamkorlik memorandumini imzolash marosimi bo‘lib o‘tdi.
Hamkorlik memorandumidan ko‘zlangan maqsad — ikki tomonlama hamkorlikni chuqurlashtirish, yangi stajirovka dasturlarini ishlab chiqish, yosh mutaxassislarni tayyorlash, ularning malakasini oshirish va ilmiy-nazariy faoliyatini qo‘llab-quvvatlash.
Tadbirda Mimar Group direktori Feruzbek Davronov, loyihalar dizayni bo‘yicha koordinator Shukurullo Jahongirov, TAQI rektori Ravshan Hakimov, HR departamenti xodimlari hamda institut professorlari ishtirok etishdi. Uchrashuvda kadrlarni tayyorlash, malakaviy amaliyot jarayonini tashkil etish, Mimar Group kompaniyasining yetakchi xodimlari tomonidan kasbiy trening va master-klasslarni o‘tkazish va ko‘plab boshqa masalalar muhokama qilindi.
“O‘z kadrlar siyosatiga amal qilib, Mimar Group yosh mutaxassislarni ish bilan ta’minlash, ularning kasbiy va shaxsiy o‘sishi uchun barcha imkoniyatlarni yaratishga katta e’tibor qaratmoqda. Joriy yilda Mimar Graduates Program dasturini amalga oshirish doirasida Toshkent arxitektura-qurilish institutining bitiruvchilari orasidan 12 nafar yoshlar tanlab olinib, ish bilan ta’minlandi. Yosh xodimlarning har biriga tajribali muhandislar biriktirildi. Umid qilamanki, memorandum imzolanishi natijasida, Mimar Group kompaniyasida amaliyot o‘tishni va ishlashni istaganlar soni keskin ko‘payadi”, — dedi Feruzbek Davronov.
O‘z navbatida, TAQI rektori Ravshan Hakimov oliy ta’lim muassasasida bakalavriatning 18 ta yo‘nalishi hamda magistraturaning 23 ta mutaxassisligi bo‘yicha kadrlar tayyorlanayotganini ta’kidlab, Mimar Group kompaniyasi bilan hamkorlik ta’lim jarayoniga ilg‘or texnologiyalarni joriy etish hamda ilm-fan va ishlab chiqarish o‘rtasida integratsiyani chuqurlashtirishga olib kelishiga ishonch bildirdi.
Uchrashuv yakunida Mimar Group kompaniyasiga ishga joylashtirilgan TAQI talabalarning sonini yanada ko‘paytirishga kelishib olindi. Shuningdek, ikki tomonlar o‘rtasidagi hamkorlik qurilish sohasidagi kadrlarni tayyorlash tizimini yangi bosqichga ko‘tarishga xizmat qilishiga ishonch bildirildi.
Reklama huquqi asosida.
Izoh (0)