Lukoil kompaniyasining homiylik ko‘magi ostida o‘zbek mumtoz musiqasini rivojlantirish va o‘zbek romanslarini tiklash bo‘yicha noyob, madaniy loyiha amalga oshirildi. “O‘zbek romanslari” yozuvlarining birinchi to‘plamini yaratish loyihasining muallifi, O‘zbekistonda xizmat ko‘rsatgan artist, O‘zbekistonning “oltin ovoz” sohibi Jenisbek Piyazov bo‘ldi.
Yangi O‘zbekistonda har tomonlama rivojlangan barkamol yosh avlodni tarbiyalash, har bir insonning ma’naviy darajasini oshirish, uning bilim doirasini kengaytirish va jahon musiqa madaniyati yutuqlarini o‘zlashtirishga alohida e’tibor qaratilmoqda. Shu nuqtayi nazardan, romans janri o‘zbek madaniyatining intellektual xazinasida munosib o‘rin egalladi va QR-kod vositasi orqali romanslar ijrosining video yozuvlarini ko‘rish imkoniyati ushbu loyihani O‘zbekistondagi, shu yo‘nalishdagi birinchi loyihaga aylantirdi.
O‘zbek xalqining vokal musiqaga azaldan bo‘lgan muhabbati va yangilanib borayotgan hayot tarzi hozirgi kunga kelib, musiqa madaniyatida yangi janr va shakllarning paydo bo‘lishining asosiy nuqtasiga aylandi, XX asr o‘zbek musiqa tarixida yangi sahifani ochdi. Taniqli bastakorlar Yunus Rajabiy, To‘xtasin Jalilovlar o‘zining ijodlaridagi qo‘shiqlarida zamonaviy hayot haqiqatlariga javob berdilar. Bastakorlar Tolibjon Sodiqov, Mutal Burhonov, Muxtor Ashrafiy, Sulaymon Yudakov, Sayfi Jalil, Sharif Ramazonovlar o‘zbek musiqasi an’analarini yangi shakllar bilan uyg‘unlashtirgan holda vokal asarlarni yaratishdi. Tarixiy jihatdan Yevropa musiqasida yuzaga kelgan romans janriga o‘zbek bastakorlari sharqona tus olib kirishdi. Avvalgi davrlardan farqli o‘laroq, o‘zbek bastakorlari nafaqat Sharq mumtoz she’riyati bilan cheklanib qoldilar, balki ularning qiziqishlari doirasi zamonaviy she’riy matnlar, shuningdek, uzoq va yaqin xorij shoirlarning asarlarini ham qamrab oldi. Yangi atoqli bastakorlar orasidan S.Polvonov, S.Boboyev, X.Rahimov, B.Umidjonov, R.Abdullayev kabi bastakorlar ushbu janrda yuksak badiiy cho‘qqilarga erishishdi.
O‘zbekiston xalq rassomi, O‘zbekiston badiiy akademiyasining raisi Akmal Nurning tengi yo‘q, betakror rasmlari, sovg‘alar kitobi va kompakt disklari muqovaning haqiqiy bezagiga aylandi. Rassom har bir romansga musiqaning majoziy ohanglariga rang va tasvir tilida obrazli urg‘u beradigan hamda uning badiiy-estetik mazmunini chuqurroq anglashga yordam beradigan rasmni tanlagan.
Jenisbek Piyazov:
“Bugun men o‘zbek romanslari yozilgan kitob va diskni qo‘limda ushlab turganimdan benihoya xursandman. Biz musiqaning ushbu ajoyib janrini qaytadan tiklash g‘oyasini amalga oshirishga muvaffaq bo‘ldik. Butun jamoa bir necha oy davomida loyiha ustida jiddiy ish olib bordi. Disk ustida ishlash uchun eng yaxshi ovoz rejissorlari, operatorlar, pedagog maslahatchilar, pianinochilar va dizaynerlar taklif etildi. Ular orasidan Otabek Nazirov, Oqilbek Piyazov, Feruza Yusupova kabi iste’dodli yosh opera ijrochilari va boshqalar tanlab olindi.
Loyihaning asosiy maqsadi, o‘tgan asrning boshlari va o‘rtalarida o‘zbek bastakorlari tomonidan yaratilgan, afsuski, ovozli yozuvlari hatto arxivlarda ham saqlanib qolmagan romanslar janrini qayta tiklash edi. Biz 13 ta klassik romansning ajoyib ohanglari va betakror ijrosini notalar bo‘yicha qaytadan tiklash imkoniyatiga ega bo‘ldik. Har bir romans uchun videoklip suratga olindi. O‘zbek romansi rivojlanishi tarixining yangi bosqichini boshlab beradigan loyihani amalga oshirishda bizga Lukoil kompaniyasi katta yordam berdi”.
Diskning taqdimoti “Madaniyat va ma’rifat” kanalida bo‘lib o‘tdi. Yozuvlar o‘zbek mumtoz musiqasini sevuvchilarda katta qiziqish uyg‘otdi va endilikda o‘zbek romanslarini o‘rganish hamda ijro etish imkoniyatiga ega bo‘lgan O‘zbekiston davlat konservatoriyasi talabalari va musiqa kollejlari o‘quvchilari orasida shov-shuv uyg‘otdi.
“Lukoil Uzbekistan Operating Company” MChJ matbuot xizmati
Reklama huquqi asosida.
Izoh (0)