Mimar Group қурилиш компанияси ва Тошкент архитектура-қурилиш институти қурилиш соҳасидаги ёш мутахассисларни тайёрлаш ҳамда уларнинг касбий ўсишига кўмаклашиш масаласида келишувга эришилди.
Mimar Group қурилиш компанияси малакали кадрларни янада жалб қилиш мақсадида, Ўзбекистондаги етакчи олий таълим муассасалари билан ҳамкорлик алоқаларини ўрнатишда давом этмоқда. 2021 йилнинг 7 июль куни Mimar Group компанияси ва Тошкент архитектура-қурилиш институти ўртасида ҳамкорлик меморандумини имзолаш маросими бўлиб ўтди.
Ҳамкорлик меморандумидан кўзланган мақсад — икки томонлама ҳамкорликни чуқурлаштириш, янги стажировка дастурларини ишлаб чиқиш, ёш мутахассисларни тайёрлаш, уларнинг малакасини ошириш ва илмий-назарий фаолиятини қўллаб-қувватлаш.
Тадбирда Mimar Group директори Ферузбек Давронов, лойиҳалар дизайни бўйича координатор Шукурулло Жаҳонгиров, ТАҚИ ректори Равшан Ҳакимов, HR департаменти ходимлари ҳамда институт профессорлари иштирок этишди. Учрашувда кадрларни тайёрлаш, малакавий амалиёт жараёнини ташкил этиш, Mimar Group компаниясининг етакчи ходимлари томонидан касбий тренинг ва мастер-классларни ўтказиш ва кўплаб бошқа масалалар муҳокама қилинди.
«Ўз кадрлар сиёсатига амал қилиб, Mimar Group ёш мутахассисларни иш билан таъминлаш, уларнинг касбий ва шахсий ўсиши учун барча имкониятларни яратишга катта эътибор қаратмоқда. Жорий йилда Mimar Graduates Program дастурини амалга ошириш доирасида Тошкент архитектура-қурилиш институтининг битирувчилари орасидан 12 нафар ёшлар танлаб олиниб, иш билан таъминланди. Ёш ходимларнинг ҳар бирига тажрибали муҳандислар бириктирилди. Умид қиламанки, меморандум имзоланиши натижасида, Mimar Group компаниясида амалиёт ўтишни ва ишлашни истаганлар сони кескин кўпаяди», — деди Ферузбек Давронов.
Ўз навбатида, ТАҚИ ректори Равшан Ҳакимов олий таълим муассасасида бакалавриатнинг 18 та йўналиши ҳамда магистратуранинг 23 та мутахассислиги бўйича кадрлар тайёрланаётганини таъкидлаб, Mimar Group компанияси билан ҳамкорлик таълим жараёнига илғор технологияларни жорий этиш ҳамда илм-фан ва ишлаб чиқариш ўртасида интеграцияни чуқурлаштиришга олиб келишига ишонч билдирди.
Учрашув якунида Mimar Group компаниясига ишга жойлаштирилган ТАҚИ талабаларнинг сонини янада кўпайтиришга келишиб олинди. Шунингдек, икки томонлар ўртасидаги ҳамкорлик қурилиш соҳасидаги кадрларни тайёрлаш тизимини янги босқичга кўтаришга хизмат қилишига ишонч билдирилди.
Реклама ҳуқуқи асосида.
Изоҳ (0)