Fotoreportaj: Rossiya janubida kuchli yomg‘ir tufayli uylar suv ostida qoldi

Rossiyaning janubiy hududlarida 16 — 17-iyun kunlari yog‘gan tropik yomg‘ir tufayli uylarni suv bosdi. Kuchli yomg‘ir, shuningdek, elektr energiyasi va transport harakatining uzilishiga olib keldi, deb yozadi “RBK”.

Kerchda tuni bilan davom etgan yomg‘irdan butun shahar ayniqsa markaziy qism zarar ko‘rdi. 230 dan ortiq xususiy va ko‘p qavatli uylarni suv bosdi. Suv toshqini tufayli Kerch yaqinidagi odamlar evakuatsiya qilinmoqda.

Kerchda 17-iyun kuni bir kechada yog‘gan yomg‘ir 1,5 oylik yog‘ingarchilik miqdoriga teng. Shahar aholisidan shaxsiy avtoulovlarda yo‘lga chiqmaslik so‘ralmoqda, shuningdek ularga yerosti yo‘llarida va boshqa chuqurlikda joylashgan xonalarda bo‘lmaslik tavsiya etiladi.

Kerchdagi Melek-Chesme va Jarjava daryolari qirg‘og‘idan toshib ketdi. Kuchli shamol daraxtlarni qulatib, elektr uzatish tarmoqlarini shikastladi. Shaharning markaziy qismida, shu jumladan kasalxonada elektr energiyasi yo‘q. Uning ishlashini ta’minlash uchun generator o‘rnatildi.

Qrimning Favqulodda vaziyatlar vazirligi ogohlantirishicha, 18-iyun kuni ham kuchli yomg‘ir, momaqaldiroq va shiddatli shamol kutilmoqda.

Kuchli yomg‘ir Rostov viloyatini ham qamrab oldi. Rostov-Donda uylar suv ostida qolmoqda, suv toshqinlari tufayli shaharda ko‘plab yo‘l-transport hodisalari sodir bo‘lgan. Rostov viloyatida keyingi kunlarda ham ob-havo yomon bo‘lishi bashorat qilinmoqda.

Favqulodda va bo‘ronli ob-havo Krasnodar o‘lkasiga ham o‘z ta’sirini o‘tkazmoqda. Sinoptiklarning ma’lumotlariga ko‘ra, mintaqada yog‘ingarchilikning katta qismi Anapa va Taman shaharlariga tushgan.