Lukoil компаниясининг ҳомийлик кўмаги остида ўзбек мумтоз мусиқасини ривожлантириш ва ўзбек романсларини тиклаш бўйича ноёб, маданий лойиҳа амалга оширилди. «Ўзбек романслари» ёзувларининг биринчи тўпламини яратиш лойиҳасининг муаллифи, Ўзбекистонда хизмат кўрсатган артист, Ўзбекистоннинг «олтин овоз» соҳиби Женисбек Пиязов бўлди.
Янги Ўзбекистонда ҳар томонлама ривожланган баркамол ёш авлодни тарбиялаш, ҳар бир инсоннинг маънавий даражасини ошириш, унинг билим доирасини кенгайтириш ва жаҳон мусиқа маданияти ютуқларини ўзлаштиришга алоҳида эътибор қаратилмоқда. Шу нуқтаи назардан, романс жанри ўзбек маданиятининг интеллектуал хазинасида муносиб ўрин эгаллади ва QR-код воситаси орқали романслар ижросининг видео ёзувларини кўриш имконияти ушбу лойиҳани Ўзбекистондаги, шу йўналишдаги биринчи лойиҳага айлантирди.
Ўзбек халқининг вокал мусиқага азалдан бўлган муҳаббати ва янгиланиб бораётган ҳаёт тарзи ҳозирги кунга келиб, мусиқа маданиятида янги жанр ва шаклларнинг пайдо бўлишининг асосий нуқтасига айланди, ХХ аср ўзбек мусиқа тарихида янги саҳифани очди. Таниқли бастакорлар Юнус Ражабий, Тўхтасин Жалиловлар ўзининг ижодларидаги қўшиқларида замонавий ҳаёт ҳақиқатларига жавоб бердилар. Бастакорлар Толибжон Содиқов, Мутал Бурҳонов, Мухтор Ашрафий, Сулаймон Юдаков, Сайфи Жалил, Шариф Рамазоновлар ўзбек мусиқаси анъаналарини янги шакллар билан уйғунлаштирган ҳолда вокал асарларни яратишди. Тарихий жиҳатдан Европа мусиқасида юзага келган романс жанрига ўзбек бастакорлари шарқона тус олиб киришди. Аввалги даврлардан фарқли ўлароқ, ўзбек бастакорлари нафақат Шарқ мумтоз шеърияти билан чекланиб қолдилар, балки уларнинг қизиқишлари доираси замонавий шеърий матнлар, шунингдек, узоқ ва яқин хориж шоирларнинг асарларини ҳам қамраб олди. Янги атоқли бастакорлар орасидан С.Полвонов, С.Бобоев, Х.Раҳимов, Б.Умиджонов, Р.Абдуллаев каби бастакорлар ушбу жанрда юксак бадиий чўққиларга эришишди.
Ўзбекистон халқ рассоми, Ўзбекистон бадиий академиясининг раиси Акмал Нурнинг тенги йўқ, бетакрор расмлари, совғалар китоби ва компакт дисклари муқованинг ҳақиқий безагига айланди. Рассом ҳар бир романсга мусиқанинг мажозий оҳангларига ранг ва тасвир тилида образли урғу берадиган ҳамда унинг бадиий-эстетик мазмунини чуқурроқ англашга ёрдам берадиган расмни танлаган.
Женисбек Пиязов:
«Бугун мен ўзбек романслари ёзилган китоб ва дискни қўлимда ушлаб турганимдан бениҳоя хурсандман. Биз мусиқанинг ушбу ажойиб жанрини қайтадан тиклаш ғоясини амалга оширишга муваффақ бўлдик. Бутун жамоа бир неча ой давомида лойиҳа устида жиддий иш олиб борди. Диск устида ишлаш учун энг яхши овоз режиссёрлари, операторлар, педагог маслаҳатчилар, пианиночилар ва дизайнерлар таклиф этилди. Улар орасидан Отабек Назиров, Оқилбек Пиязов, Феруза Юсупова каби истеъдодли ёш опера ижрочилари ва бошқалар танлаб олинди.
Лойиҳанинг асосий мақсади, ўтган асрнинг бошлари ва ўрталарида ўзбек бастакорлари томонидан яратилган, афсуски, овозли ёзувлари ҳатто архивларда ҳам сақланиб қолмаган романслар жанрини қайта тиклаш эди. Биз 13 та классик романснинг ажойиб оҳанглари ва бетакрор ижросини ноталар бўйича қайтадан тиклаш имкониятига эга бўлдик. Ҳар бир романс учун видеоклип суратга олинди. Ўзбек романси ривожланиши тарихининг янги босқичини бошлаб берадиган лойиҳани амалга оширишда бизга Lukoil компанияси катта ёрдам берди».
Дискнинг тақдимоти «Маданият ва маърифат» каналида бўлиб ўтди. Ёзувлар ўзбек мумтоз мусиқасини севувчиларда катта қизиқиш уйғотди ва эндиликда ўзбек романсларини ўрганиш ҳамда ижро этиш имкониятига эга бўлган Ўзбекистон давлат консерваторияси талабалари ва мусиқа коллежлари ўқувчилари орасида шов-шув уйғотди.
«Lukoil Uzbekistan Operating Company» МЧЖ матбуот хизмати
Реклама ҳуқуқи асосида.
Изоҳ (0)