Dunyo va o‘zbek sportiga oid 15-iyul tongining muhim xabarlari dayjesti bilan tanishing.
O‘zbekiston
Mashhur sport jurnalisti va yozuvchi Vladimir Safarov 82 yoshida vafot etdi. Safarov hayoti davomida O‘zbekiston futboliga oid ko‘plab ilmiy, statistik va tarixiy kitoblar yozib qoldirgan. Shuningdek, u musiqaning jaz yo‘nalishida faoliyat olib borgan.
“Turon” davralar oralig‘idagi tanaffusdan foydalangan holda jamoa tarkibini kuchaytirishga katta urg‘u bermoqda. Yaypan klubi o‘z safiga “Mash’al”dan yarim himoyachi Sardor Abduraimov va hujumchi Humoyun Murtazoyevni qo‘shib oldi. Klub matbuot xizmatiga ko‘ra har ikkala futbolchi bilan ham uzoq muddatli shartnoma imzolangan. Avvalroq “Turon” tojikistonlik himoyachi bilan kelishuvga erishgandi.
O‘zbekiston futzal milliy terma jamoasi Tailandda o‘tadigan xalqaro o‘rtoqlik o‘yinida ishtirok etadi. 25–30-iyul kunlari bo‘lib o‘tadigan musobaqaning guruh bosqichida Bahodir Ahmedov jamoasi Tailand, Kosovo va Mozambik vakillari bilan o‘zaro kuch sinashadi.
Jahon
Italiya A Seriyasining 2021/22-yilgi mavsumi uchun qur’a tashlandi. Unga ko‘ra dastlabki tur uchrashuvlari 21–22-avgust kunlari bo‘lib o‘tadigan bo‘ldi. Undagi juftliklar quyidagicha ko‘rinish oldi:A Seriya, 1-tur
21–22-avgust
“Bolonya” – “Salernitana”
“Kalyari” – “Spetsiya”
“Empoli” – “Latsio”
“Verona” – “Sassuolo”
“Inter” – “Jenoa”
“Napoli” – “Venetsiya”
“Roma” – “Fiorentina”
“Sampdoriya” – “Milan”
“Torino” – “Atalanta”
“Udineze” – “Yuventus”.
“Real” pandemiya tufayli 2020-yilning mart oyidan beri 300 million yevro yo‘qotgan. Bu haqda klubning moliyaviy hisobotida ma’lum qilindi. Qo‘llangan choralardan so‘ng esa klub yilni atigi 874 ming yevro daromad bilan tugatishga erishgan.
“Real” prezidenti bilan sodir bo‘layotgan mojaro rivojlanishda davom etmoqda. Avvalroq Peresning klub afsonalari Raul va Iker Kasilyas haqida 2006-yilda aytgan gaplari tarmoqqa sizdirilgandi. Endi esa El Confidencial gazetasi Krishtianu Ronaldu va jamoa sobiq murabbiylari Joze Mourinyo va Visente del Boske haqidagi audioyozuvlarni e’lon qildi. Funksioner nashrni sudga bermoqchi.
Lionel Messi “Barselona” bilan yangi shartnoma imzolash borasida kelishib oldi. Diario Sport nashrining yozishicha, tomonlar 5 yillik shartnoma imzolaydi va bu haqda iyul oyining oxirida rasman e’lon qilinadi. Messi yangi kelishuvga ko‘ra maoshining 50 foizga pasayishiga rozi bo‘ladi.
https://www.instagram.com/p/CRUFuRlCOlc/
Chexiya terma jamoasi hujumchisi Patrik Shikning Shotlandiyaga 45 metrdan urgan goli Yevro–2020 ning eng chiroyli sifatida e’tirof etildi.
Milliarder Alisher Usmonovning jiyani Sarvar Ismoilov “Everton” direktorlar kengashidan o‘rin oldi. Bu haqda klub rasmiy saytida e’lon qilindi. 26 yoshli Ismoilov “Everton” klubi direktorlar kengashida klub xo‘jayini Farhod Moshirining vakili sifatida ishtirok etadi va klubning Alisher Usmonovga tegishli bo‘lgan USM Holdings kompaniyasi bilan aloqalarini mustahkamlash bilan shug‘ullanadi.
Transfer yangiliklari
“PSJ” navbatdagi yirik transferni amalga oshirdi. Parijliklar bu safar “Milan”ni erkin agen sifatida tark etgan Janluiji Donnarummani o‘z safiga qo‘shib oldi. Italiyalik 22 yoshli darvozabon bilan 2026-yilgacha mo‘ljallangan shartnoma imzolandi. Jamoa avvalroq Serxio Ramos va Jorjinyo Veynaldum singari yulduz futbolchilarni o‘z safiga qo‘shib olgandi.
“Barselona” va “Atletiko M” Antuan Grizmann hamda Saulni almashtirish variantini ko‘rib chiqmoqda. Fabrisio Romanoning qayd etishicha, muzokaralar ko‘tarinki ruhda o‘tmoqda va futbolchilar ham ushbu bitimga qarshi emasligini bildirgan. “Barselona”ga Serxio Aguero va Memfis Depay kelganidan keyin asosiy tarkibdan muqim joy olish ehtimoli pasaygan Grizmannga, shuningdek, ingliz klublaridan ham qiziqishlar bor.
Izoh (0)