Дунё ва ўзбек спортига оид 15 июль тонгининг муҳим хабарлари дайжести билан танишинг.
Ўзбекистон
Машҳур спорт журналисти ва ёзувчи Владимир Сафаров 82 ёшида вафот этди. Сафаров ҳаёти давомида Ўзбекистон футболига оид кўплаб илмий, статистик ва тарихий китоблар ёзиб қолдирган. Шунингдек, у мусиқанинг жаз йўналишида фаолият олиб борган.
«Турон» давралар оралиғидаги танаффусдан фойдаланган ҳолда жамоа таркибини кучайтиришга катта урғу бермоқда. Яйпан клуби ўз сафига «Машъал»дан ярим ҳимоячи Сардор Абдураимов ва ҳужумчи Ҳумоюн Муртазоевни қўшиб олди. Клуб матбуот хизматига кўра ҳар иккала футболчи билан ҳам узоқ муддатли шартнома имзоланган. Аввалроқ «Турон» тожикистонлик ҳимоячи билан келишувга эришганди.
Ўзбекистон футзал миллий терма жамоаси Таиландда ўтадиган халқаро ўртоқлик ўйинида иштирок этади. 25–30 июль кунлари бўлиб ўтадиган мусобақанинг гуруҳ босқичида Баҳодир Аҳмедов жамоаси Таиланд, Косово ва Мозамбик вакиллари билан ўзаро куч синашади.
Жаҳон
Италия А Сериясининг 2021/22 йилги мавсуми учун қуръа ташланди. Унга кўра дастлабки тур учрашувлари 21–22 август кунлари бўлиб ўтадиган бўлди. Ундаги жуфтликлар қуйидагича кўриниш олди:А Серия, 1-тур
21–22 август
«Болонья» – «Салернитана»
«Кальяри» – «Специя»
«Эмполи» – «Лацио»
«Верона» – «Сассуоло»
«Интер» – «Женоа»
«Наполи» – «Венеция»
«Рома» – «Фиорентина»
«Сампдория» – «Милан»
«Торино» – «Аталанта»
«Удинезе» – «Ювентус».
«Реал» пандемия туфайли 2020 йилнинг март ойидан бери 300 миллион евро йўқотган. Бу ҳақда клубнинг молиявий ҳисоботида маълум қилинди. Қўлланган чоралардан сўнг эса клуб йилни атиги 874 минг евро даромад билан тугатишга эришган.
«Реал» президенти билан содир бўлаётган можаро ривожланишда давом этмоқда. Аввалроқ Переснинг клуб афсоналари Рауль ва Икер Касильяс ҳақида 2006 йилда айтган гаплари тармоққа сиздирилганди. Энди эса El Confidencial газетаси Криштиану Роналду ва жамоа собиқ мураббийлари Жозе Моуриньо ва Висенте дел Боске ҳақидаги аудиоёзувларни эълон қилди. Функционер нашрни судга бермоқчи.
Лионель Месси «Барселона» билан янги шартнома имзолаш борасида келишиб олди. Diario Sport нашрининг ёзишича, томонлар 5 йиллик шартнома имзолайди ва бу ҳақда июль ойининг охирида расман эълон қилинади. Месси янги келишувга кўра маошининг 50 фоизга пасайишига рози бўлади.
https://www.instagram.com/p/CRUFuRlCOlc/
Чехия терма жамоаси ҳужумчиси Патрик Шикнинг Шотландияга 45 метрдан урган голи Евро–2020 нинг энг чиройли сифатида эътироф этилди.
Миллиардер Алишер Усмоновнинг жияни Сарвар Исмоилов «Эвертон» директорлар кенгашидан ўрин олди. Бу ҳақда клуб расмий сайтида эълон қилинди. 26 ёшли Исмоилов «Эвертон» клуби директорлар кенгашида клуб хўжайини Фарҳод Моширининг вакили сифатида иштирок этади ва клубнинг Алишер Усмоновга тегишли бўлган USM Holdings компанияси билан алоқаларини мустаҳкамлаш билан шуғулланади.
Трансфер янгиликлари
«ПСЖ» навбатдаги йирик трансферни амалга оширди. Парижликлар бу сафар «Милан»ни эркин аген сифатида тарк этган Жанлуижи Доннаруммани ўз сафига қўшиб олди. Италиялик 22 ёшли дарвозабон билан 2026 йилгача мўлжалланган шартнома имзоланди. Жамоа аввалроқ Серхио Рамос ва Жоржиньо Вейналдум сингари юлдуз футболчиларни ўз сафига қўшиб олганди.
«Барселона» ва «Атлетико М» Антуан Гризманн ҳамда Саулни алмаштириш вариантини кўриб чиқмоқда. Фабрисио Романонинг қайд этишича, музокаралар кўтаринки руҳда ўтмоқда ва футболчилар ҳам ушбу битимга қарши эмаслигини билдирган. «Барселона»га Серхио Агуэро ва Мемфис Депай келганидан кейин асосий таркибдан муқим жой олиш эҳтимоли пасайган Гризманнга, шунингдек, инглиз клубларидан ҳам қизиқишлар бор.
Изоҳ (0)