Афғонистоннинг Бадахшон вилояти Вахон туманида яшовчи 77 нафар фуқаро «Толибон»нинг таъқибидан қочиб, Тожикистон ҳудудига ўтди. Бу ҳақда Тожикистон Миллий хавфсизлик давлат қўмитаси чегара қўшинлари матбуот марказига таяниб, «Интерфакс» хабар берди.
«13 июль куни маҳаллий вақт билан соат 16:00 да Афғонистон Республикаси фуқаролари бўлган 77 киши, хусусан, 26 нафар эркак, 20 нафар аёл ва 31 нафар вояга етмаганлар Тожикистонга келди. Асосан, Бадахшон вилоятининг Вахон туманидаги Андемин қирғиз қишлоғи аҳолиси бўлган ушбу кишилар, «Толибон» таъқибидан қўрқиб ва ўз ҳаётларини сақлаб қолиш учун Тожикистоннинг Мурғоб вилояти, Қизилработ қишлоғидаги давлат чегарасини кесиб ўтган», — дейилади хабарда.
Тожикистон чегарачилари афғон қочқинларини «инсонпарварлик сабаблари билан» Тожикистонга киритишга рухсат берган. Ҳозир улар Мурғоб вилояти Қизилработ жамоатининг Андемин ва Чештеба туманларида.
Афғонистон биринчи вице-президенти Амрулла Солиҳ Бадахшон вилояти аҳолисининг қўшни Тожикистонга қочиб кетишига изоҳ берар экан, «Толибон’ Бадахшон Помиридан ўнлаб оилаларни қувиб чиқарган» деди.
«Толибон’ уларни ислом динини қабул қилишга ёки кетишга мажбур қилмоқда. Бу аҳоли асрлар давомида шу ерда яшаб, қийинчиликлардан омон қолган ва ҳудудни тарк этмаган қирғизлардир. Энди улар ўз тақдирларини кутиб, Тожикистонда ўтирибди», — деб ёзган Солиҳ ижтимоий тармоқда.
Охирги икки ҳафта ичида, тахминан, 1500 минг нафар Афғонистон ҳарбийлари «Толибон» вакиллари билан ҳарбий тўқнашувлардан кейин Тожикистон ҳудудига қочиб ўтган эди.
Маълумотларга кўра, айни вақтда «Толибон» мамлакатнинг 370 та ҳудудидан 110 тасини ўз назоратига олган. Афғонистон ҳукумати қўшинларининг ҳарбийлар гуруҳи «Толибон» билан кескин тўқнашувлардан кейин Тожикистон ва Ўзбекистон ҳудудига қочиб ўтмоқда. 5 июль куни Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этган.
Аввал Россия Афғонистондаги вазият туфайли Тожикистондаги ҳарбий базасидан фойдаланишга тайёрлиги, Туркманистон Афғонистон билан чегара ҳудудидаги ҳарбий сафарбарликни кучайтириши, Путин афғон-тожик чегарасидаги вазиятнинг кескинлашуви муносабати билан Тожикистонга ёрдам беришни ваъда қилгани ҳақида хабарлар берилган.
Изоҳ (0)