Farg‘onada ichimlik suvi bilan bog‘liq muammolarni hal etish maqsadida 132 ta suv qudug‘i ishga tushirilishi ma’lum qilindi

Farg‘ona viloyatida aholini toza ichimlik suvi bilan ta’minlash borasidagi muammolarni hal etish maqsadida 2021-yil davomida 132 ta suv qudug‘i ishga tushiriladi. Bu haqda “Daryo” muxbiri Azizjon Ermatov xabar bermoqda.

Qayd etilishicha, Farg‘onada 2017—2021-yillarda ichimlik suvi ta’minoti va kanalizatsiya tizimlarini kompleks rivojlantirish hamda modernizatsiya qilish bo‘yicha amalga oshirilayotgan ishlar yuzasidan matbuot anjumani o‘tkazilgan.

Matbuot anjumanida ushbu sohada yig‘ilib qolgan ko‘p yillik tizimli muammolarni hal etish, ichimlik suvi ta’minotini takomillashtirish, aholining kundalik turmushida muhim bo‘lgan kommunal xizmatlar ko‘rsatish tizimini yaxshilash yo‘nalishida jamiyat tomonidan amalga oshirilayotgan ishlar to‘g‘risida ma’lumot berilgan.

“Farg‘ona suv ta’minoti” korxonasi rahbari Murodjon Yo‘ldoshevning ma’lum qilishicha, 2021-yilda viloyatda ichimlik suvi ta’minotini yaxshilash maqsadida 132 ta ichimlik suv qudug‘i va 6 dona suv saqlash hovuzi ishga tushirilishi, 738 km ichimlik suvi tarmog‘i, 46 km oqova suv tarmog‘i qurish, 80 dona suv minorasi hamda 106 dona suv nasosi o‘rnatish rejalashtirilgan.

Ta’kidlanishicha, mazkur ishlar amalga oshirilishi natijasida viloyatda 400 ming nafardan ortiq aholining ichimlik suvi ta’minoti yaxshilanadi.