Фарғона вилоятида аҳолини тоза ичимлик суви билан таъминлаш борасидаги муаммоларни ҳал этиш мақсадида 2021 йил давомида 132 та сув қудуғи ишга туширилади. Бу ҳақда «Дарё» мухбири Азизжон Эрматов хабар бермоқда.
Қайд этилишича, Фарғонада 2017—2021 йилларда ичимлик суви таъминоти ва канализация тизимларини комплекс ривожлантириш ҳамда модернизация қилиш бўйича амалга оширилаётган ишлар юзасидан матбуот анжумани ўтказилган.
Матбуот анжуманида ушбу соҳада йиғилиб қолган кўп йиллик тизимли муаммоларни ҳал этиш, ичимлик суви таъминотини такомиллаштириш, аҳолининг кундалик турмушида муҳим бўлган коммунал хизматлар кўрсатиш тизимини яхшилаш йўналишида жамият томонидан амалга оширилаётган ишлар тўғрисида маълумот берилган.
«Фарғона сув таъминоти» корхонаси раҳбари Муроджон Йўлдошевнинг маълум қилишича, 2021 йилда вилоятда ичимлик суви таъминотини яхшилаш мақсадида 132 та ичимлик сув қудуғи ва 6 дона сув сақлаш ҳовузи ишга туширилиши, 738 км ичимлик суви тармоғи, 46 км оқова сув тармоғи қуриш, 80 дона сув минораси ҳамда 106 дона сув насоси ўрнатиш режалаштирилган.
Таъкидланишича, мазкур ишлар амалга оширилиши натижасида вилоятда 400 минг нафардан ортиқ аҳолининг ичимлик суви таъминоти яхшиланади.
Изоҳ (0)