Toshkentdagi O‘zbekiston davlat san’at va madaniyat instituti talabasi kursdoshining ukasi bilan janjallashishi oqibatida tan jarohati olib koma holatiga tushib qolgani haqida xabar berilgandi. Ushbu jinoyatni sodir etgan fuqaroga sud qonuniy chora ko‘rdi, deya xabar bermoqda “Bu kun” informatsion dasturi.
Ma’lum bo‘lishicha, voqea sodir bo‘lgan kun amaliy dars jarayonlari paytida kiyinish xonasida poyabzal ustidan tortishuv kelib chiqadi. Tushunmovchilikni darsdan so‘ng hal qilishni kelishib olgan yigitlar ta’lim dargohidan chiqib aholi yashaydigan xonadonlar tomon yo‘l oladi.
Janjal oqibatida 20 yoshli J.A. ismli yigit tan jarohati olib kasalxonaga yotqiziladi.
Jabrlanuvchining otasi aytishicha, o‘g‘lini 3 kishi urgan. Biroq ayblanuvchining advokati himoyasidagi shaxs bu ishni bir o‘zi sodir qilganini ma’lum qilgan.
“Aybimdan pushaymonman. Agar o‘sha kun qaytib kelganida u bola bilan urishmasdim. Kechirim so‘rayman”, – deydi 18 yoshli ayblanuvchi.
Ayblanuvchi Jinoyat kodeksining 104-moddasi 2-qismi “e”,“k” bandlari (bezorilik oqibatida bir guruh shaxslar tomonidan qasddan badanga og‘ir shikast yetkazish) bilan aybdor deb topildi va unga nisbatan 5 yil muddatga ozodlikdan mahrum qilish jazosi tayinlandi. Tayinlangan jazo umumiy tartibli koloniyalarda o‘tash belgilandi.
Bundan avval Toshkentda 73 yoshli erkakka kuch ishlatgan PPX xodimlariga sud hukmi o‘qilgani, Jizzaxda xotinini xiyonat qilishda ayblab, uni o‘ldirib qo‘ygan shaxs 14 yilga qamalgani hamda Jizzaxda mast erkak ustachilik bilan shug‘ullanib kelgan xonadoshini paqir bilan urib o‘ldirib qo‘ygani haqida xabar berilgandi.
Izoh (0)