Namangan viloyatining Uchqo‘rg‘on tumanidagi xonadonlardan birida og‘irligi 80 kilogrammdan yuqori bo‘lishi kutilayotgan oshqovoqlar yetishtirildi. Bu haqda “Daryo” muxbiri Azizbek Abduvaliyev xabar bermoqda.
Oshqovoqlarni Uchqo‘rg‘on tumanidagi “Paxtachi” mahallasida istiqomat qiluvchi 35 yashar Ahrorbek Qo‘chqorov yetishtirdi. U tumandagi agrokorxonalardan birida nasos ustasi bo‘lib ishlaydi. 16 sotixli hovlisida ro‘zg‘orga yaraydigan deyarli barcha meva-sabzavot va poliz ekinlari, jumladan, kartoshka-sabzi, qovun-tarvuz, oshqovoq va makkajo‘xori ekkan.
“Rossiyada ishlaydigan bir tanishim yangilik, ekib ko‘ring, deb 10 tacha oshqovoq urug‘i olib kelgandi. Ekdim, har tupida 3-4 tadan soldi. Hali pishmay turib, hamma yoqqa ovozasi ketdi. Shu turishida 50 kilo atrofida bor, yana bir-ikki oydan keyin 80 kilogrammdan oshadi”, — deydi Ahrorbek.
Hozirda Uchqo‘rg‘ondagi gigant oshqovoqni ko‘rish va uning fonida suratga tushish uchun uzoq-yaqindan kelayotganlarning oqimi tinmayapti.
Izoh (0)