Sherzod Asadov Afg‘oniston harbiylarini O‘zbekistonda vaqtincha saqlab turish bo‘yicha AQShdan murojaat bo‘lmaganini aytdi

Prezident matbuot kotibi Sherzod Asadov 12-iyul, dushanba kuni o‘tkazilgan brifingdan so‘ng jurnalistlarning Afg‘onistondagi vaziyatga oid savollariga javob berdi, deya xabar qilmoqda “Daryo” muxbiri.

“2012-yilda qabul qilingan ‘O‘zbekiston Respublikasining tashqi siyosiy faoliyati Konsepsiyasini tasdiqlash to‘g‘risida’gi va ‘Mudofaa to‘g‘risida’gi qonunimizga muvofiq, O‘zbekiston hududida hech qanday xorijiy harbiy bazalarning joylashtirilishi mumkin emas va biz hech qanday harbiy-siyosiy bloklarga ham qo‘shila olmaymiz. Bu qonunlarda belgilab qo‘yilgan. Bundan tashqari, KXShT (Kollektiv xavfsizlik shartnomasi tashkiloti — tahr.)ga a’zo davlatlar tomonidan ham bizga hech qanday taklif kelib tushgani yo‘q”, — dedi Asadov.

U Amerika hukumati tomonidan O‘zbekistonga afg‘on askarlarini vaqtincha o‘zining hududida saqlab turish bo‘yicha so‘rov bo‘lmaganligini qayd etdi.

“AQSh tomonidan bunday so‘rov bo‘lganini men bilmayman. O‘zbekistonga hech qanday rasmiy taklif bo‘lmagan. Biz bu vaziyatda, avvalo, Afg‘onistonni gumanitar va iqtisodiy tomondan qo‘llab-quvvatlab, yordamimizni ko‘rsatishimiz mumkin.

Joriy hafta bo‘ladigan konferensiyamizning ham asosiy mavzularidan biri mana shu, ya’ni notinch paytda Markaziy va Janubiy Osiyo davlatlari, va umuman olganda, keng jahon hamjamiyati Afg‘onistonga qanday yordam bera olishi mumkinligi hamda bu ikki yirik hududning keyinchalik qanday iqtisodiy nuqtayi nazardan barqaror rivojlanishi ta’minlanishi muhokama qilinadi”, — dedi Asadov.