Тошкентдаги Ўзбекистон давлат санъат ва маданият институти талабаси курсдошининг укаси билан жанжаллашиши оқибатида тан жароҳати олиб кома ҳолатига тушиб қолгани ҳақида хабар берилганди. Ушбу жиноятни содир этган фуқарога суд қонуний чора кўрди, дея хабар бермоқда «Бу кун» информацион дастури.
Маълум бўлишича, воқеа содир бўлган кун амалий дарс жараёнлари пайтида кийиниш хонасида пойабзал устидан тортишув келиб чиқади. Тушунмовчиликни дарсдан сўнг ҳал қилишни келишиб олган йигитлар таълим даргоҳидан чиқиб аҳоли яшайдиган хонадонлар томон йўл олади.
Жанжал оқибатида 20 ёшли Ж.А. исмли йигит тан жароҳати олиб касалхонага ётқизилади.
Жабрланувчининг отаси айтишича, ўғлини 3 киши урган. Бироқ айбланувчининг адвокати ҳимоясидаги шахс бу ишни бир ўзи содир қилганини маълум қилган.
«Айбимдан пушаймонман. Агар ўша кун қайтиб келганида у бола билан уришмасдим. Кечирим сўрайман», – дейди 18 ёшли айбланувчи.
Айбланувчи Жиноят кодексининг 104-моддаси 2-қисми «e»,«к» бандлари (безорилик оқибатида бир гуруҳ шахслар томонидан қасддан баданга оғир шикаст етказиш) билан айбдор деб топилди ва унга нисбатан 5 йил муддатга озодликдан маҳрум қилиш жазоси тайинланди. Тайинланган жазо умумий тартибли колонияларда ўташ белгиланди.
Бундан аввал Тошкентда 73 ёшли эркакка куч ишлатган ППХ ходимларига суд ҳукми ўқилгани, Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани ҳамда Жиззахда маст эркак устачилик билан шуғулланиб келган хонадошини пақир билан уриб ўлдириб қўйгани ҳақида хабар берилганди.
Изоҳ (0)