Namanganda IIB xodimlari ota-bolani hech qanday sababsiz olib ketayotgani aytilgan video yuzasidan rasmiy ma’lumot berildi

10-iyul kuni ijtimoiy tarmoqlarda “Namanganda IIB xodimlari ota-bolani hech qanday sababsiz olib ketishmoqda” nomli video tarqaldi. Viloyat IIB matbuot xizmati holat yuzasidan rasmiy ma’lumot berdi.

Mazkur holat o‘rganilganda voqea shu kuni soat 13:30 larda Namangan shahar chorrahasida yuz bergani aniqlangan. 1986-yilda tug‘ilgan O.V. o‘zining boshqaruvida bo‘lgan Nexia-2’da chorrahadagi svetoforning qizil chirog‘ida harakatlanib, yo‘l harakati qoidalarini buzgan vaqtda IIO xodimi uning oldiga kelib, o‘zini IIO xodimi ekanligini tanishtirib xizmat guvohnomasini ko‘rsatib, uning harakatlari yo‘l qoidalariga zid ekanligi, yo‘l harakatining boshqa ishtirokchilariga xalaqit berayotganligi to‘g‘risida ogohlantirib, avtomashina boshqarish huquqini beruvchi hujjatlar mavjudligini tekshirish uchun so‘ragan.

Haydovchi esa hujjatlarni taqdim etishdan bosh tortib, IIO xodimining qonuniy talablarini bajarmasdan turli xil bahonalar qilib, boshqa fuqarolarni o‘ziga jalb etgan holda uyatli so‘zlar ishlatib, IIO xodimini shaxsiyatiga teggan. Ushbu holatni ko‘rgan avtomashina haydovchisining 35 yoshli tanishi B.N. IIO xodimini oldiga kelib uning o‘z xizmat vazifasini bajarishiga qarshilik ko‘rsatib mazkur holatga aralashgan va boshqa fuqarolarni o‘ziga jalb etgan holda uyatli so‘zlar ishlatib, IIO xodimini haqoratlab, tanishi avtomashinasini boshqarib hodisa joyidan ketgan.

Shundan so‘ng chorrahadagi holatni ko‘rgan hududiy profilaktika inspektori kelib IIO xodimi bilan birgalikda o‘z xizmat vazifasini bajarishiga qarshilik ko‘rsatgan fuqaroni shaxsiga oydinlik kiritish maqsadida IIB ma’muriy binosiga olib ketmoqchi bo‘lganida mazkur holatni fuqarolar videotasvirga olib ijtimoiy tarmoqlarga chiqarib yuborgani aniqlangan.