Наманганда ИИБ ходимлари ота-болани ҳеч қандай сабабсиз олиб кетаётгани айтилган видео юзасидан расмий маълумот берилди

10 июль куни ижтимоий тармоқларда «Наманганда ИИБ ходимлари ота-болани ҳеч қандай сабабсиз олиб кетишмоқда» номли видео тарқалди. Вилоят ИИБ матбуот хизмати ҳолат юзасидан расмий маълумот берди.

Мазкур ҳолат ўрганилганда воқеа шу куни соат 13:30 ларда Наманган шаҳар чорраҳасида юз бергани аниқланган. 1986 йилда туғилган О.В. ўзининг бошқарувида бўлган Nexia-2’да чорраҳадаги светофорнинг қизил чироғида ҳаракатланиб, йўл ҳаракати қоидаларини бузган вақтда ИИО ходими унинг олдига келиб, ўзини ИИО ходими эканлигини таништириб хизмат гувоҳномасини кўрсатиб, унинг ҳаракатлари йўл қоидаларига зид эканлиги, йўл ҳаракатининг бошқа иштирокчиларига халақит бераётганлиги тўғрисида огоҳлантириб, автомашина бошқариш ҳуқуқини берувчи ҳужжатлар мавжудлигини текшириш учун сўраган.

Ҳайдовчи эса ҳужжатларни тақдим этишдан бош тортиб, ИИО ходимининг қонуний талабларини бажармасдан турли хил баҳоналар қилиб, бошқа фуқароларни ўзига жалб этган ҳолда уятли сўзлар ишлатиб, ИИО ходимини шахсиятига тегган. Ушбу ҳолатни кўрган автомашина ҳайдовчисининг 35 ёшли таниши Б.Н. ИИО ходимини олдига келиб унинг ўз хизмат вазифасини бажаришига қаршилик кўрсатиб мазкур ҳолатга аралашган ва бошқа фуқароларни ўзига жалб этган ҳолда уятли сўзлар ишлатиб, ИИО ходимини ҳақоратлаб, таниши автомашинасини бошқариб ҳодиса жойидан кетган.

Шундан сўнг чорраҳадаги ҳолатни кўрган ҳудудий профилактика инспектори келиб ИИО ходими билан биргаликда ўз хизмат вазифасини бажаришига қаршилик кўрсатган фуқарони шахсига ойдинлик киритиш мақсадида ИИБ маъмурий биносига олиб кетмоқчи бўлганида мазкур ҳолатни фуқаролар видеотасвирга олиб ижтимоий тармоқларга чиқариб юборгани аниқланган.