Surxondaryoda muqaddam 7 marotaba sudlangan erkak IIB xodimlaridan norozi bo‘lib lezviya bilan tanasiga jarohat yetkazdi

Ijtimoiy tarmoqlarda “Surxondaryo viloyatida yangi ‘vor v zakon’ paydo bo‘ldi” sarlavhasi ostidagi videolavha tarqaldi. Viloyati IIB matbuot xizmati ushbu videolavha yuzasidan Muzrabot tumani IIB mas’ul xodimlari tomonidan o‘rganish ishlari olib borilganini ma’lum qildi.

Aniqlanishicha, videodagi voqea 26-aprel kuni soat 16:30 lar atrofida yuz bergan. 1981-yilda Muzrabot tumanida tug‘ilgan, muqaddam Jinoyat kodeksining 169-moddasi (o‘g‘rilik) bilan besh marotaba, 277-moddasi (bezorilik) bilan 1 marotaba, Rossiya Jinoyat kodeksining 162-moddasi (bosqinchilik) bilan bir marotaba sudlangan, vaqtincha ishsiz fuqaro M.A. tuman IIB binosiga mast holda kelib sababsiz baqir-chaqir qilgan.

Tuman IIB xodimlari uni tinchlantirishga urinishiga qaramasdan, muqaddam sudlanganligi sababli zarurat tug‘ilgan vaqtda tuman IIBga profilaktik suhbatga chaqirtirilayotganligidan norozi ekanligini bildirib, yonida bo‘lgan bir marotabalik soqol olish uchun mo‘ljallangan olmos (lezviya) bo‘lagi bilan o‘zining tana qismini bir necha joyidan tilib o‘ziga tan jarohati yetkazgan.

Shu sababli tuman IIB TB NQ katta inspektori uning yoniga borib qo‘lidagi olmosini topshirishini so‘rab, olmosni olmoqchi bo‘lganida M.A. olmosni bo‘yin qismiga olib kelib “yaqinlashsalaring tomirimni kesaman!”, deb baqir-chaqirni davom ettirgan. Shundan so‘ng u bilan tushuntirish ishlari davom ettirilishi natijasida qo‘lidagi olmosini otib yuborgan va tez tibbiy yordam chaqirtirilib, unga tez tibbiy yordam ko‘rsatilgan.

Holat yuzasidan shu vaqtning o‘zida Muzrabot tuman prokuraturasiga xabar qilingan. Mazkur holat ushbu kuni tuman IIB TB NQ katta inspektori tomonidan rasmiylashtirilgan. Fuqaro M.A. hushyor holga kelgach undan holat yuzasidan tushuntirish xati olinganida qilgan ishidan pushaymonligini, pivo ichib mast holatda bo‘lganligi sababli o‘zining xatti-harakatlarini boshqara olmaganligini ma’lum qilgan.

Holat yuzasidan tuman IIB HPB profilaktika inspektori tomonidan 5-may kuni Jinoyat protsessual kodeksining 83-moddasi 2-bandiga asosan jinoyat ishi qo‘zg‘atishdan rad etilgan.