Yevropa Ittifoqi koronavirusga qarshi vaksinalarning nojo‘ya ta’sirlari haqida ma’lum qildi

Yevropa dor-darmon agentligi (EMA) xavfsizlik qo‘mitasi koronavirusga qarshi vaksina olgan bemorlarda kuzatiladigan nojo‘ya ta’sirlar bo‘yicha olib borilayotgan tadqiqotlarining dastlabki natijalarini sarhisob qildi.

Gap Yevropa Ittifoqi hududida foydalanish uchun rasman tasdiqlangan vaksinalar haqida ketmoqda.

Qo‘mita hisobotida qayd etilishicha, Comirnaty va Spikevax vaksinalari (Pfizer / BioNTech va Moderna tomonidan ishlab chiqarilgan mRNK vaksinalari) juda kam hollarda miokardit (yurak mushagining yallig‘lanishi) va perikardit (yurakni o‘rab turgan membrananing yallig‘lanishi)ga olib kelishi mumkin. Ushbu kasalliklarni vaksinalarning nojo‘ya ta’sirlari ro‘yxatiga qo‘shish tavsiya etiladi.

Yevroittifoq mamlakatlarida taxminan 177 million doza Pfizer / BioNTech vaksinasi ishlatilgan, ulardan so‘ng 145 ta miokardit va 138 ta perikardit holati qayd etilgan. Moderna vaksinasining taxminan 2 million dozasi yuborilgan, emlanganlar orasida ikkala yurak xastaligi bo‘yicha jami 19 ta holat aniqlangan.

Johnson & Johnson kompaniyasining Janssen preparati Yevropa regulyatori tomonidan kapillyar oqish sindromi (qon plazmasi qon tomirlari devorlari orqali to‘qimalarga tushadi) bilan kasallangan odamlarga tavsiya etilmaydi. Ushbu noyob kasallik Janssen vaksinasini qabul qilganlarning atigi uch nafarida qayd etilgan, ulardan ikki nafari vafot etgan.

EMA Giyen-Barre sindromi bo‘lgan odamlarni AstraZeneca bilan emlashdan oldin ogohlantirishni taklif qildi. Giyen-Barre kam uchraydigan autoimmun kasallik bo‘lib, asab tugunlarini yallig‘lantiradi va mushaklarning kuchsizlanishiga, og‘riqqa, karaxtlikka va harakatlanishda qiyinchiliklarga olib keladi.

Og‘ir holatlarda Giyen-Barre sindromi nutq va yutinish qobiliyatini susaytirishi mumkin. Sindrom har qanday yoshdagi odamlarga ta’sir qilishi mumkin, ammo u ko‘pincha kattalar va erkaklarda uchraydi.

AstraZeneca vaksinasidan foydalanish tasdiqlangan paytda ushbu sindrom ehtimoliy nojo‘ya reaksiya sifatida qayd etilgandi. EMA kasallik va inyeksiya o‘rtasida bog‘liqlikni hali topmagan, ammo tibbiyot xodimlari va bemorlar uchun risolalarda sindrom haqida ogohlantirishni tavsiya qildi.

Yevropa regulyatorining hisobotida Rossiya vaksinalari, shu jumladan, “Sputnik V” preparati haqida ma’lumotlar mavjud emas, chunki ular Yevropa Ittifoqida ro‘yxatdan o‘tmagan.