AQShning Shimoliy Karolina shtati sudi “Voentorg” (harbiy xizmatchilar hamda ularning oilalarini savdo va maishiy qo‘llab-quvvatlash tizimi) rahbarining sobiq o‘rinbosari Leonid Teyfni besh yilga ozodlikdan mahrum qildi. Bu haqda Meduza xabar berdi.
Xabarga ko‘ra, qamoqdan chiqqandan keyin Teyf yana uch yil politsiya nazorati ostida bo‘ladi.
AQShda 2010-yildan beri yashab kelayotgan Teyf 2018-yilda hibsga olingan. Tergov ma’lumotlaridagi versiyaga ko‘ra, u “pul yuvish” uchun til biriktirishda ayblangan. Teyf 2010-yildan 2012-yilgacha “Voentorg” direktorining o‘rinbosari sifatida ishlab, tashkilot bilan shartnomalar tuzgan subpudratchilardan noqonuniy ravishda haq olgan. Shu tarzda u 150 million dollardan ko‘proq mablag‘ni qo‘lga kiritib, keyinchalik ularni Amerika banklari orqali “yuvgan”.
Agar Teyf ushbu versiya bo‘yicha aybdor deb topilganda, u 20 yilgacha ozodlikdan mahrum qilinishi mumkin edi, ammo 2021-yil mart oyida Teyf tergov bilan kelishuv tuzdi. Shundan so‘ng prokuratura unga besh yil berilishini talab qilib, 50 bandli ayblovning 47 tasini bekor qildi. Teyfning o‘zi poraxo‘rlik, vizaga oid firibgarlik va chet el aktivlari to‘g‘risida yolg‘on ma’lumotlar berganlik bo‘yicha aybini tan oldi.
Avvalroq Belarus Oliy sudi Viktor Babarikoni 14 yilga ozodlikdan mahrum qilgani haqida xabar berilgandi, jazo qattiq tartibdagi koloniyada o‘taladi. Belarusning eng taniqli bankirlaridan biri bo‘lgan Babariko 2020-yilda prezidentlik uchun nomzodini qo‘ygandi.
Izoh (0)