Eronda poyezdlar harakati jadvali ishlamayapti, bunga temiryo‘l kompyuter tizimiga uyushtirilgan kiberhujum sabab bo‘lishi mumkin, deb yozadi “Korrespondent.net” mahalliy OAVga tayanib.
“Mamlakat milliy temiryo‘l kompaniyasining kompyuter tizimidagi uzilishlar sababli 9-iyul kuni kuni Eronda temiryo‘l stansiyalarini tartibsizliklar qamrab oldi”, — deyiladi xabarda.
Qayd etilishicha, Eronning yarim rasmiy agentligi Fars uzilishlarning sababi keng ko‘lamli kiberhujum deb atagan. “Yuzlab temiryo‘l qatnovlari keyinga qoldirildi yoki bekor qilindi, chiptaxonalar ishlamayapti, yuk va yo‘lovchilarga elektron xizmat ko‘rsatish to‘xtatildi”, — deb yozadi agentlik.
Xabarga ko‘ra, Eron temiryo‘l kompaniyasining rasmiy veb-sayti ham ishlamay qolgan.
9-iyul kuni Eron poytaxti Tehronning g‘arbiy qismida, taxminan milliy bog‘ hududida kuchli portlash sodir bo‘lgandi. Portlash ovozi Eron poytaxtining chekka hududlariga ham eshitilgan.
Avvalroq Eronda prezident saylovi uchastkalaridan saylov qutilarini olib ketayotgan vertolyot halokatga uchragani, Eronning yangi prezidenti mamlakatdagi korrupsiya va qashshoqlikka qarshi kurashishga va’da bergani haqida xabar berilgandi.
Izoh (0)