Transport vazirligi va “Uzbekistan Airports” AJ rahbariyati O‘zbekistonda havo transporti sohasida sayyohlarga ko‘rsatilayotgan xizmat sifatini o‘rganmoqda

O‘zbekiston Respublikasi transport vazirining topshirig‘iga asosan, transport vazirining maslahatchisi boshchiligidagi ishchi guruh va “Uzbekistan Airports” AJning qator rahbarlari kelayotgan yo‘lovchilar o‘rtasida so‘rovnoma o‘tkazish va havo transporti sohasida xizmat ko‘rsatish sifatini o‘rganish maqsadida, Islom Karimov nomidagi Toshkent xalqaro aeroportiga tashrif buyurishdi.

So‘rovnomada O‘zbekiston Respublikasi fuqarolari va chet ellik sayyohlar ishtirok etdi. Respondentlar aviachiptalarni sotib olish uchun onlayn xizmatning qulayligi va samaradorligi hamda onlayn parvozlar jadvalining aniqligini ta’kidlashdi.

So‘rovnoma ko‘rsatganidek, aviachiptalarni sotib olishning eng ommabop usuli aviakassalar hisoblanadi. Bundan tashqari, so‘rov ishtirokchilari ma’lumot xizmati va parvozlar to‘g‘risida ma’lumotni o‘z vaqtida taqdim etish darajasini yuqori baholashdi. Shuni ham ta’kidlash joizki, sayyohlar samolyot bortida tozalik darajasi va keytering xizmati (oziq-ovqat bilan ta’minlash) to‘g‘risida a’lo darajadagi izohlarni qoldirishdi.

Bundan tashqari, yo‘lovchilar xizmatlar sifatini oshirish bo‘yicha aniq tavsiyalar berishdi, xususan, mahalliy duty-free’da mahsulotlar turini ko‘paytirish va aeroport xodimlari o‘rtasida chet tillari darajasini oshirish masalalari ko‘tarildi.

Transport vazirligi havo transporti sohasida ko‘rsatilayotgan xizmatlar sifati bilan bog‘liq onlayn so‘rovnoma o‘tkazilayotganini yana bir bor eslatib o‘tdi. So‘rovnomada ishtirok etishni xohlagan har bir inson quyida keltirilgan QR-kodlar orqali unda qatnashishi mumkin.

Transport vazirligi matbuot xizmati