Ўзбекистон Республикаси транспорт вазирининг топшириғига асосан, транспорт вазирининг маслаҳатчиси бошчилигидаги ишчи гуруҳ ва «Uzbekistan Airports» АЖнинг қатор раҳбарлари келаётган йўловчилар ўртасида сўровнома ўтказиш ва ҳаво транспорти соҳасида хизмат кўрсатиш сифатини ўрганиш мақсадида, Ислом Каримов номидаги Тошкент халқаро аэропортига ташриф буюришди.
Сўровномада Ўзбекистон Республикаси фуқаролари ва чет эллик сайёҳлар иштирок этди. Респондентлар авиачипталарни сотиб олиш учун онлайн хизматнинг қулайлиги ва самарадорлиги ҳамда онлайн парвозлар жадвалининг аниқлигини таъкидлашди.
Сўровнома кўрсатганидек, авиачипталарни сотиб олишнинг энг оммабоп усули авиакассалар ҳисобланади. Бундан ташқари, сўров иштирокчилари маълумот хизмати ва парвозлар тўғрисида маълумотни ўз вақтида тақдим этиш даражасини юқори баҳолашди. Шуни ҳам таъкидлаш жоизки, сайёҳлар самолёт бортида тозалик даражаси ва кейтеринг хизмати (озиқ-овқат билан таъминлаш) тўғрисида аъло даражадаги изоҳларни қолдиришди.
Бундан ташқари, йўловчилар хизматлар сифатини ошириш бўйича аниқ тавсиялар беришди, хусусан, маҳаллий duty-free’да маҳсулотлар турини кўпайтириш ва аэропорт ходимлари ўртасида чет тиллари даражасини ошириш масалалари кўтарилди.
Транспорт вазирлиги ҳаво транспорти соҳасида кўрсатилаётган хизматлар сифати билан боғлиқ онлайн сўровнома ўтказилаётганини яна бир бор эслатиб ўтди. Сўровномада иштирок этишни хоҳлаган ҳар бир инсон қуйида келтирилган QR-кодлар орқали унда қатнашиши мумкин.
Транспорт вазирлиги матбуот хизмати
Изоҳ (0)