Namanganda yil mobaynida test sinovlari o‘tkaziladigan majmua quriladi. Bu haqda Davlat test markazi viloyat bo‘limi boshlig‘i Bunyod Abdulhafizov ma’lum qildi, deya xabar beradi “Daryo” muxbiri Azizbek Abduvaliyev.
Abdulhafizovning aytishicha, buning uchun Namangan shahar hokimining tegishli qarori qabul qilingan va Davlatobod tumanidagi “Yuksalish” massividan 2 gektar yer maydoni ajratilgan.
“Majmuadan yil mobaynida test sinovlari o‘tkazish imkonini beradigan 1000 o‘rinli pavilyon va DTM viloyat bo‘limi binosi o‘rin oladi. Hozirda loyiha-smeta hujjatlarini tayyorlash va mutasaddi tashkilotlar bilan kelishish jarayoni ketmoqda. Majmuani kelgusi yil 1-iyunga qadar foydalanishga topshirish rejalashtirilgan”, — deydi DTM vakili.
Ma’lumot uchun, hozirda Buxoroda 1000 o‘rinli shunday majmua qurib bitkazilmoqda. Namangandagi pavilyon respublikadagi ikkinchi inshoot bo‘lishi ko‘zda tutilgan. Bu yerda joriy yilgi abituriyentlar, balki oldingi yillarda OTMlarga kira olmaganlar qayta o‘zini sinab ko‘rishi, boshqa o‘quv muassasalari, xususan, Prezident maktabiga imtihonlar o‘tkazilishi mumkin.
Izoh (0)