Aholiga tarqatiladigan gaz ballonlarni o‘zlashtirgan “Shofirkontumangaz” xodimiga nisbatan jinoyat ishi qo‘zg‘atildi. Bu haqda Bosh prokuratura huzuridagi departament matbuot xizmati xabar qildi.
Ma’lum qilinishicha, departamentning Shofirkon tuman bo‘limi tomonidan o‘tkazilgan tergovga qadar tekshiruvda, “Shofirkontumangaz” suyultirilgan gaz ballon o‘rnatib berish xizmati xodimi Q.S. o‘zining moddiy javobgarligida bo‘lgan 105 dona umumiy qiymati 34,1 million so‘mlik maishiy gaz ballonlarni aholiga tarqatmasdan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Jizzaxda 123 million so‘m kredit mablag‘larni talon-toroj qilib o‘zlashtirgan rahbarga jinoiy ish qo‘zg‘atilgani, Buxoroda voyaga yetmagan ikki qiz o‘zganing xonadonidan konditsioner o‘g‘irlagani hamda “O‘zbekiston temir yo‘llari” metro qurilishida 899 million so‘m talon-toroj qilinishida kompaniyaning aloqasi yo‘qligini ma’lum qilgani haqida xabar berilgandi.
Izoh (0)