Samarqandda terrorchi tashkilotlar g‘oyalari ta’siriga tushib, Suriyaga ketmoqchi bo‘lgan bir guruh shaxslar qo‘lga olindi

Samarqand viloyati Ishtixon tumanida Suriyada jangovar harakatlarda ishtirok etish uchun ketayotgan bir guruh shaxslar qo‘lga olindi. Bu haqda viloyat IIB xabar qildi.

Ishtixon tumanida yashovchi bir guruh shaxslar internet tarmog‘i orqali terrorchi tashkilotlar g‘oyalari ta’siriga tushib qolgan. Oqibatda jamoat bo‘lib Turkiya orqali Suriyadagi jangovar harakatlarda ishtirok etishni maqsad qilgan.

Ular shu maqsad bilan mazkur mamlakatga ketishga tayyorgarlik ko‘rayotgan vaqtda viloyat davlat xavfsizligi xizmati va ichki ishlar boshqarmalari xodimlari tomonidan qo‘lga olindi.

Hozirda ushbu holat yuzasidan tezkor-surishtiruv tadbirlari olib borilmoqda.

Bundan avval Samarqandda “Hizb ut-Tahrir” terroristik tashkilotiga a’zo 6 nafar shaxs aniqlangani, Sirdaryoda ekstremistik guruh a’zosi sifatida 20 kishi ushlangani hamda Samarqandda Suriya va Yaqin Sharqdagi terroristik tashkilotlarga qo‘shilmoqchi bo‘lgan 14 nafar fuqaro aniqlangani haqida xabar berilgandi.