Коронавирус инфекциясини юқтирганларни марказлаштирилган даволаш мақсадида Самарқанд шаҳридаги спорт мажмуасида 1000 ўринли саралаш ва тақсимлаш маркази ўз фаолиятини қайта бошлади. Бу ҳақда STV хабар қилди.
Марказ 2021 йилнинг август ойида ташкил этилган ва беморлар сонининг камайиши сабабли ёпилганди.
«Бунгача COVID-19 ташхиси қўйилган беморлар 340 ўринли иккита махсус касалхонада даволанарди. Бироқ беморлар сонининг кўпайиши сабабли биз марказ очишга мажбур бўлдик.
Унда вилоятнинг шаҳар ва туманларидан келган беморларни даволаш учун зарур бўлган барча нарсалар мавжуд. Марказда 100 га яқин мутахассислар ишлайди», – дейди Самарқанд шаҳар соғлиқни сақлаш бошқармаси раҳбари Аҳмаджон Бобожонов.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ, «Ўзэкспомарказ» 750 ўринли коронавирусга чалинган беморларни даволашга ихтисослашган марказ қайтадан ташкил этилгани тўғрисида хабар берилганди.
Эслатиб ўтамиз, 2020 йил ноябрь ойининг охирларида Аtlas ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.
Изоҳ (0)