Davlat statistika qo‘mitasi iyun oyida O‘zbekiston bo‘yicha umumiy iste’mol narxlari indeksiga oid hisoboti bilan bo‘lishdi.
Unga ko‘ra, 2021-yilning iyun oyida iste’mol bozoridagi tovarlar va xizmatlar o‘rtacha 0,2 foizga arzonlashgan. Ushbu holat asosan mavsumiy omil bilan belgilanadi. Ta’kidlanishicha, narxlar pasayishi mevalar va yong‘oqlar (-3,8 foiz), yog‘-moy mahsulotlari (-2,8 foiz), sabzavotlar, ildizmevalilar, plantaynlar va dukkaklilar (-2,6 foiz), hamda sut mahsulotlari va tuxumda (-1,6 foiz) kuzatilgan.
Iyun oyida asosiy oziq-ovqat mahsulotlaridan (meva-sabzavotlardan tashqari) tuxum narxlari sezilarli darajada arzonlashgan (-7,6 foiz). O‘simlik yog‘i narxlarini barqarorlashtirish bo‘yicha amalga oshirilgan kompleks chora-tadbirlar natijasida ularning narxlari ushbu davrda respublika bo‘yicha o‘rtacha 3,6 foizga arzonlashgan.
Shuningdek, iyunda tovuq go‘shti (-0,1 foiz dan -0,5 foizgacha), yangi sog‘ilgan sut (-0,3 foiz), muzlatilgan baliq, grechka (-0,2 foiz), tvorog, guruch va guruch oqshog‘i (-0,1 foiz) narxlarida pasayish qayd etilgan.
Boshqalarga nisbatan, go‘sht mahsulotlari, shakar, qandolat mahsulotlari sezilarli (0,4 foiz) darajada oshgan. Xususan, salqin ichimliklar (0,9 foiz), shakar (0,8 foiz), mol go‘shti (0,6—0,7 foiz) va qo‘y go‘shti (0,4 foiz) qimmatlashgan.
Avvalroq O‘zbekiston ikkilamchi bozorida uy-joylar bir chorakda qariyb 6 foizga qimmatlashgani to‘g‘risida xabar berilgandi.
Izoh (0)