Ўзбекистонда июнь ойида гўшт, шакар, қандолат маҳсулотлари ва салқин ичимликлар қимматлашди

Давлат статистика қўмитаси июнь ойида Ўзбекистон бўйича умумий истеъмол нархлари индексига оид ҳисоботи билан бўлишди.

Унга кўра, 2021 йилнинг июнь ойида истеъмол бозоридаги товарлар ва хизматлар ўртача 0,2 фоизга арзонлашган. Ушбу ҳолат асосан мавсумий омил билан белгиланади. Таъкидланишича, нархлар пасайиши мевалар ва ёнғоқлар (-3,8 фоиз), ёғ-мой маҳсулотлари (-2,8 фоиз), сабзавотлар, илдизмевалилар, плантайнлар ва дуккаклилар (-2,6 фоиз), ҳамда сут маҳсулотлари ва тухумда (-1,6 фоиз) кузатилган.

Июнь ойида асосий озиқ-овқат маҳсулотларидан (мева-сабзавотлардан ташқари) тухум нархлари сезиларли даражада арзонлашган (-7,6 фоиз). Ўсимлик ёғи нархларини барқарорлаштириш бўйича амалга оширилган комплекс чора-тадбирлар натижасида уларнинг нархлари ушбу даврда республика бўйича ўртача 3,6 фоизга арзонлашган.

Шунингдек, июнда товуқ гўшти (-0,1 фоиз дан -0,5 фоизгача), янги соғилган сут (-0,3 фоиз), музлатилган балиқ, гречка (-0,2 фоиз), творог, гуруч ва гуруч оқшоғи (-0,1 фоиз) нархларида пасайиш қайд этилган.

Бошқаларга нисбатан, гўшт маҳсулотлари, шакар, қандолат маҳсулотлари сезиларли (0,4 фоиз) даражада ошган. Хусусан, салқин ичимликлар (0,9 фоиз), шакар (0,8 фоиз), мол гўшти (0,6—0,7 фоиз) ва қўй гўшти (0,4 фоиз) қимматлашган.

Аввалроқ Ўзбекистон иккиламчи бозорида уй-жойлар бир чоракда қарийб 6 фоизга қимматлашгани тўғрисида хабар берилганди.