2016-yilning sentabrida “Navoiyazot” aksiyadorlik jamiyati bazasida ammiak va karbamid ishlab chiqarish bo‘yicha kompleks qurilishi boshlangan bo‘lib, Enter Engineering kompaniyalari guruhi bu loyihada subpudratchi sifatida qatnashdi. Enter Engineering kompaniyasi O‘zbekistondagi eng yirik ЕРС pudratchi va Markaziy Osiyo, Rossiya bozorlarida, sanoat qurilishida tan olingan yetakchidir. Kompaniya neft-gaz, kimyo, energetika va fuqarolik obyektlarini qurish va modernizatsiya qilish bo‘yicha yirik loyihalarni amalga oshirishda ishtirok etadi. Enter Engineering mijozlari: Lukoil, AK Transneft, Arcticgas, Achimgaz, Severneftegazprom, O‘zbekneftgaz, O‘ztransgaz, Mitsubishi Heavy Industries, Hyundai Engineering, Oltin yo‘l GTL, Samarqand turistik markazi, Natural Gas Stream, Surhan Gas Chemical Operating Company, Jizzakh Petroleum va boshqa neftni qayta ishlash kompaniyalari hisoblanadi.
Loyihadan ko‘zlangan asosiy maqsad, “Navoiyazot” AJ negizida mineral o‘g‘itlar ishlab chiqarish bo‘yicha zamonaviy, energiya tejamkor texnologiyalar asosida ishlovchi, yangi majmuani tashkil etish edi.
Joriy yilning aprel oyida majmuani qurish va uni modernizatsiyalash ishlari to‘liq yakunlandi. Loyihaning umumiy qiymati 1 milliard dollarga teng bo‘lib, shundan 110 million dollarlik ishlar Enter Engineering kompaniyalari guruhi hissasiga to‘g‘ri keldi. Loyihadagi o‘z hissasini amalga oshirish uchun kompaniya tomonidan 2235 nafar mahalliy va xorijlik ishchilar va mutaxassislar jalb etildi. Shuningdek, 110 ta texnikadan foydalanildi. Kompaniya quruvchilari va mutaxassislari umumiy qurilish va ishga tushirishdan avvalgi sozlash-o‘rnatish ishlarini, jumladan, metall konstruksiyalarni montaj qilish, zanglashga qarshi ishlov berish, texnologik quruvlarni montaj qilish va payvandlash, texnik uskunalarni montaj qilish, nazorat-o‘lchash asboblarini o‘rnatish kabi katta hajmdagi ishlarni bajarishdi.
Texnologik uskunalarning aksariyat qismi Yaponiya va Yevropadan import qilindi. Majmua bunyodkorligi Mitsubishi Heavy Industries Ltd hamda Mitsubishi Corporation nomli Yaponiya konsorsiumi kompaniyalari bilan hamkorlikda amalga oshirildi. Bundan tashqari, ishlab chiqarish texnologiyalarining katta qismi ammiak va karbamid ishlab chiqarishda foydalanish uchun mo‘ljallangan uskunalarni ishlab chiqarish borasida, dunyoda eng ilg‘orlardan sanalgan Daniyaning Haldor Topsoe, Italiyaning Saipem va Gollandiyaning Uhde Fertilizer Technology kompaniyalaridan olindi. Ishlab chiqarish kompleksi qurilishining texnologik bosqichlarida foydalanilgan eng zamonaviy va innovatsion texnologiyalar ekologik zararsizligi hamda energetik samaradorligi jihatidan dunyodagi eng so‘nggi ishlanmalar hisoblanadi.
Loyihaning amalga oshirilishi va obyektni modernizatsiyalash natijasida “Navoiyazot” AJning 1964-yilda qurilgan, eskirgan va energiyani ko‘p sarflovchi ammiak ishlab chiqarish bo‘yicha 1 va 2-sexlari yopildi. Majmuada yiliga 660 ming tonna ammiak va 577,5 ming tonna karbamid ishlab chiqariladi. 330 000 tonna ammiak yangi karbamidni ishlab chiqarish uchun, qolgan 330 000 tonnasi esa amalda ammiak selitrasi ishlab chiqarish bilan band korxonalarga yo‘naltiriladi. Ammiak azot asosidagi o‘g‘itlarni, turli kimyoviy mahsulotlarni ishlab chiqarishda, karbamid esa farmatsevtikada, yengil va kimyoviy sanoat ishlab chiqarish sohalarida ishlatiladi. Majmua to‘liq quvvat bilan ishlay boshlagach, respublikadagi kimyoviy ishlab chiqarish sohasi ko‘rsatkichi 9,5 foizga oshadi.
Qishloq xo‘jaligi sohasida karbamidga bo‘lgan ehtiyoj to‘liq qondiriladi. Xususan, agrotexnikaviy ishlov berish davrida donli ekinlar va paxtazorlarni karbamidli qo‘shimcha mineral o‘g‘itlar bilan o‘g‘itlash ishlarini o‘z vaqtida amalga oshirish imkoni yaratiladi. Bundan tashqari, majmuada ishlab chiqarilgan mahsulotni Markaziy Osiyo davlatlari, Afg‘oniston, Turkiya, Ukraina va Gruziyaga eksport qilish istiqbollari yuzaga keladi.
Enter Engineering matbuot xizmati
Izoh (0)