2016 йилнинг сентябрида «Навоийазот» акциядорлик жамияти базасида аммиак ва карбамид ишлаб чиқариш бўйича комплекс қурилиши бошланган бўлиб, Enter Engineering компаниялари гуруҳи бу лойиҳада субпудратчи сифатида қатнашди. Enter Engineering компанияси Ўзбекистондаги энг йирик ЕРС пудратчи ва Марказий Осиё, Россия бозорларида, саноат қурилишида тан олинган етакчидир. Компания нефть-газ, кимё, энергетика ва фуқаролик объектларини қуриш ва модернизация қилиш бўйича йирик лойиҳаларни амалга оширишда иштирок этади. Enter Engineering мижозлари: Lukoil, AK Transneft, Arcticgas, Achimgaz, Севернефтегазпром, Ўзбекнефтгаз, Ўзтрансгаз, Mitsubishi Heavy Industries, Hyundai Engineering, Oltin yo‘l GTL, Самарқанд туристик маркази, Natural Gas Stream, Surhan Gas Chemical Operating Company, Jizzakh Petroleum ва бошқа нефтни қайта ишлаш компаниялари ҳисобланади.
Лойиҳадан кўзланган асосий мақсад, «Навоийазот» АЖ негизида минерал ўғитлар ишлаб чиқариш бўйича замонавий, энергия тежамкор технологиялар асосида ишловчи, янги мажмуани ташкил этиш эди.
Жорий йилнинг апрель ойида мажмуани қуриш ва уни модернизациялаш ишлари тўлиқ якунланди. Лойиҳанинг умумий қиймати 1 миллиард долларга тенг бўлиб, шундан 110 миллион долларлик ишлар Enter Engineering компаниялари гуруҳи ҳиссасига тўғри келди. Лойиҳадаги ўз ҳиссасини амалга ошириш учун компания томонидан 2235 нафар маҳаллий ва хорижлик ишчилар ва мутахассислар жалб этилди. Шунингдек, 110 та техникадан фойдаланилди. Компания қурувчилари ва мутахассислари умумий қурилиш ва ишга туширишдан аввалги созлаш-ўрнатиш ишларини, жумладан, металл конструкцияларни монтаж қилиш, занглашга қарши ишлов бериш, технологик қурувларни монтаж қилиш ва пайвандлаш, техник ускуналарни монтаж қилиш, назорат-ўлчаш асбобларини ўрнатиш каби катта ҳажмдаги ишларни бажаришди.
Технологик ускуналарнинг аксарият қисми Япония ва Европадан импорт қилинди. Мажмуа бунёдкорлиги Mitsubishi Heavy Industries Ltd ҳамда Mitsubishi Corporation номли Япония консорсиуми компаниялари билан ҳамкорликда амалга оширилди. Бундан ташқари, ишлаб чиқариш технологияларининг катта қисми аммиак ва карбамид ишлаб чиқаришда фойдаланиш учун мўлжалланган ускуналарни ишлаб чиқариш борасида, дунёда энг илғорлардан саналган Даниянинг Haldor Topsoe, Италиянинг Saipem ва Голландиянинг Uhde Fertilizer Technology компанияларидан олинди. Ишлаб чиқариш комплекси қурилишининг технологик босқичларида фойдаланилган энг замонавий ва инновацион технологиялар экологик зарарсизлиги ҳамда энергетик самарадорлиги жиҳатидан дунёдаги энг сўнгги ишланмалар ҳисобланади.
Лойиҳанинг амалга оширилиши ва объектни модернизациялаш натижасида «Навоийазот» АЖнинг 1964 йилда қурилган, эскирган ва энергияни кўп сарфловчи аммиак ишлаб чиқариш бўйича 1 ва 2-цехлари ёпилди. Мажмуада йилига 660 минг тонна аммиак ва 577,5 минг тонна карбамид ишлаб чиқарилади. 330 000 тонна аммиак янги карбамидни ишлаб чиқариш учун, қолган 330 000 тоннаси эса амалда аммиак селитраси ишлаб чиқариш билан банд корхоналарга йўналтирилади. Аммиак азот асосидаги ўғитларни, турли кимёвий маҳсулотларни ишлаб чиқаришда, карбамид эса фармацевтикада, енгил ва кимёвий саноат ишлаб чиқариш соҳаларида ишлатилади. Мажмуа тўлиқ қувват билан ишлай бошлагач, республикадаги кимёвий ишлаб чиқариш соҳаси кўрсаткичи 9,5 фоизга ошади.
Қишлоқ хўжалиги соҳасида карбамидга бўлган эҳтиёж тўлиқ қондирилади. Хусусан, агротехникавий ишлов бериш даврида донли экинлар ва пахтазорларни карбамидли қўшимча минерал ўғитлар билан ўғитлаш ишларини ўз вақтида амалга ошириш имкони яратилади. Бундан ташқари, мажмуада ишлаб чиқарилган маҳсулотни Марказий Осиё давлатлари, Афғонистон, Туркия, Украина ва Грузияга экспорт қилиш истиқболлари юзага келади.
Enter Engineering матбуот хизмати