Toshkent hayvonot bog‘idagi jonivorlar jaziramada qiynalib qolmasligi uchun barcha shart-sharoitlar yaratilgan, deb xabar bermoqda muassasa matbuot xizmati.
“Masalan, volyerlarda suv purkaydigan iqlim nazorati tizimlari o‘rnatilgan. U havoni salqinlashtiradi va quyosh tig‘i avjiga chiqqan kunlarda jaziramaga dosh berishga yordam beradi”, — deb qayd etgan hayvonot bog‘i ma’muriyati.
Xabarda aytilishicha, mikroiqlim tizimlari “Qo‘lga o‘rgatilgan jonivorlar” bo‘limidan “Akvariumlar” bo‘limigacha alleya bo‘ylab o‘rnatilgan. Shuningdek ular primatlar pavilyonida, to‘tixonada, terrariumda, kenguru, pakana begemot va ko‘l yonidagi kafeda ham o‘rnatilgan.
“Shuningdek, jonivorlarimiz volyerlaridagi hovuzlar tozaligi haqida ham qayg‘uramiz. Ayiqpolvonlarimiz Zuzu, Ayka, Slava va Kolya ham har tongda suvga tushib olib, maza qilib cho‘milishadi va tetiklanib olishadi. Begemotlarimiz Judi va Avral esa suvdan umuman chiqishmaydi, uning salqinligi va tozaligidan bahra olishadi.
Bundan tashqari, Toshkent hayvonot bog‘i hududi bo‘ylab jonivorlar va o‘simliklarga qulay yashash sharoitlarini kafolatlaydigan sug‘orish tizimlari o‘rnatilgan”, — deb ta’kidlangan xabarda.
Avvalroq ijtimoiy tarmoqlarda Nukusdagi xususiy tadbirkorga tegishli “Nukus hayvonot bog‘i”da jonivorlarning suvsizlikdan qiynalayotgani, ularga yaratilgan sharoitlar talab darajasida emasligi to‘g‘risida xabar tarqalgandi. Ekopartiya ushbu hayvonot bog‘idagi holatni o‘z nazoratiga oldi.
Izoh (0)