Тошкент ҳайвонот боғидаги жониворлар аномал иссиқда қандай сақланмоқда?

Тошкент ҳайвонот боғидаги жониворлар жазирамада қийналиб қолмаслиги учун барча шарт-шароитлар яратилган, деб хабар бермоқда муассаса матбуот хизмати.

«Масалан, волерларда сув пуркайдиган иқлим назорати тизимлари ўрнатилган. У ҳавони салқинлаштиради ва қуёш тиғи авжига чиққан кунларда жазирамага дош беришга ёрдам беради», — деб қайд этган ҳайвонот боғи маъмурияти.

Хабарда айтилишича, микроиқлим тизимлари «Қўлга ўргатилган жониворлар» бўлимидан «Аквариумлар» бўлимигача аллея бўйлаб ўрнатилган. Шунингдек улар приматлар павильонида, тўтихонада, террариумда, кенгуру, пакана бегемот ва кўл ёнидаги кафеда ҳам ўрнатилган.

«Шунингдек, жониворларимиз волерларидаги ҳовузлар тозалиги ҳақида ҳам қайғурамиз. Айиқполвонларимиз Зузу, Айка, Слава ва Коля ҳам ҳар тонгда сувга тушиб олиб, маза қилиб чўмилишади ва тетикланиб олишади. Бегемотларимиз Жуди ва Аврал эса сувдан умуман чиқишмайди, унинг салқинлиги ва тозалигидан баҳра олишади.

Бундан ташқари, Тошкент ҳайвонот боғи ҳудуди бўйлаб жониворлар ва ўсимликларга қулай яшаш шароитларини кафолатлайдиган суғориш тизимлари ўрнатилган», — деб таъкидланган хабарда.

Аввалроқ ижтимоий тармоқларда Нукусдаги хусусий тадбиркорга тегишли «Нукус ҳайвонот боғи»да жониворларнинг сувсизликдан қийналаётгани, уларга яратилган шароитлар талаб даражасида эмаслиги тўғрисида хабар тарқалганди. Экопартия ушбу ҳайвонот боғидаги ҳолатни ўз назоратига олди.