Prezident Shavkat Mirziyoyev qaroriga asosan, O‘zbekistonda mis sanoati klasteri tashkil etiladi. Bu haqda 5-iyul, dushanba kuni o‘tkazilgan brifingda davlat rahbari matbuot kotibi Sherzod Asadov so‘z yuritdi, deya xabar bermoqda “Daryo” muxbiri.
“O‘zbekiston Prezidenti 28-iyun kuni mis ishlab chiqarishni yanada rivojlantirish hamda sanoat klasterini tashkil etish masalalari yuzasidan yig‘ilish o‘tkazdi.
Davlatimiz rahbari bu sohaga alohida e’tibor qaratayotganlari bejiz emas. Xalqaro ekspertlarning fikricha, elektromobillar, elektrotexnika va qayta tiklanuvchi energiya sohalarining rivojlanishi evaziga 2030-yilga borib dunyoda misga bo‘lgan talab 40 foizga oshishi kutilmoqda.
O‘zbekistonda esa bu bozorni egallash bo‘yicha juda katta imkoniyat bor. Oxirgi yillarda geologik qidiruvlarga ajratilgan mablag‘lar natijasida yurtimizda yangi-yangi konlar topilmoqda. Xususan, bugungi kunda 40 million tonnadan ortiq mis zaxirasi aniqlangan.
Eng asosiysi, davlatimiz rahbari endi misni quruq xomashyo shaklida emas, balki uni qayta ishlab, qo‘shilgan qiymatli mahsulot sifatida sotish talabini qo‘ymoqdalar”, — dedi Asadov.
Uning ta’kidlashicha, hozirgi kunda O‘zbekiston misning qariyb 60 foizini xomashyo sifatida eksport qilmoqda.
“Misdan keladigan daromad 2,5 milliard dollarni tashkil etyapti. Kelgusi 5 yilda mis ishlab chiqarish hajmini 400 ming tonnagacha yetkazish orqali bu ko‘rsatkichni, turdosh tarmoqlar bilan birga, 7—8 milliard dollarga yetkazish mumkin.
Shuningdek, mis ishlab chiqarishda 1 ta ish o‘rni tashkil etilsa, klaster usulida unga bog‘liq elektrotexnika, mashinasozlik, injiniring kabi sohalarda 6 tagacha ish o‘rni yaratiladi, ya’ni ish o‘rinlari 6 barobar ko‘payadi. Shu maqsadda, Prezidentimiz qaroriga muvofiq, Mis sanoati klasteri tashkil etilmoqda. Ushbu klaster tomonidan loyihalashtirishdan tortib tayyor mahsulot ishlab chiqarishgacha bo‘lgan barcha jarayonlar tizimli yo‘lga qo‘yiladi.
Bundan tashqari, geologiya-qidiruv ishlari ham davom ettiriladi. Davlatimiz rahbari yig‘ilishda rangli va noyob metallarni qidiruv ishlarini kengaytirish bo‘yicha 5 yillik dastur ishlab chiqish bo‘yicha topshiriq berdilar”, — dedi Prezident matbuot kotibi.
Izoh (0)