Ўзбекистонда коронавирус бўйича ташкил қилинган Call-марказларга мурожаатлар кескин кўпайган, дея хабар бермоқда Соғлиқни сақлаш вазирлиги матбуот хизмати.
Соғлиқни сақлаш вазирлиги томонидан 2020 йилнинг 15 март куни 1003 ягона қисқа рақамли Call-марказ ишга туширилганди. Фуқаролар ушбу рақамга қўнғироқ қилиб, коронавирус инфекцияси билан боғлиқ барча саволларга мутахассислардан аниқ ва асосли жавоб олмоқда.
Call-марказ ҳозирда ҳам фаолият кўрсатмоқда. Касаллик авжига чиққан вақтда унда 200 нафардан ортиқ профессор ўқитувчилар, шифокорлар уч сменада узлуксиз фуқароларнинг мурожаатларига жавоб берган бўлса, ҳозирда 30 нафар мутахассис уч сменада қўнғироқларни қабул қилмоқда.
Қайд этилишича, ҳозирда Call-марказга кунига 1100–1200 та мурожаат келиб тушмоқда. Бу 20 кун аввалга қараганда 3 баробар кўп.
«Аҳолидан кеча 1360 та мурожаат келиб тушган. 20 кун аввал кунига 300–400 та қўнғироқ бўлиб турарди.
Карантин қоидаларига амал қилиш керак, ниқоб тақиш керак. Лекин фуқароларимиз бунга жуда ҳам суст қарамоқда» – дейди Call-марказ мутахассиси Феруз Тожиев.
Аксарият мурожаатчилар Тошкент шаҳри ва вилоятлардаги COVID-19 билан оғриган беморларни қабул қилаётган шифохоналарнинг манзили ва телефон рақамини сўрамоқда.
Аввалроқ Зангиотадаги касалхона беморлар билан тўлгани, 2 минг кишига мўлжалланган жойда 2,5 мингдан ортиқ бемор даволанаётгани тўғрисида хабар берилганди. Шунингдек, Тошкент шаҳрида ДХХ тасарруфидаги «Ёшлик» ҳамда ИИВ тасарруфидаги «Универсал» спорт мажмуаларида ковид-марказ қайтадан ташкил этилган.Мамлакатда кунлик касалланиш ҳолатлари сони яна ортиб бормоқда. Шу сабабли республика бўйлаб 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.
Изоҳ (0)