Toshkent viloyati Bo‘stonliq tumanidagi 80 sotix yerni noqonuniy ravishda sotmoqchi bo‘lgan shaxs qo‘lga olindi, deya xabar qilmoqda IIV axborot xizmati.
Qayd etilishicha, 2021-yil 1-iyul kuni O‘zbekiston IIVga N.M. ariza bilan murojaat qilib, unda S. ismli shaxs yuqori lavozimda ishlovchi tanishlari orqali Toshkent viloyati Bo‘stonliq tumani Chorbog‘ qo‘rg‘oni “Bochka” suv bo‘yicha turistik va boshqa dam olish maskani qurish uchun mo‘ljallangan 80 sotix bo‘sh yer maydonini kadastr hujjatlarini tayyorlab, 450 000 AQSH dollariga sotishini, bo‘nak sifatida 20 000 AQSH dollarini berishini talab qilayotganligini ma’lum qilib, unga nisbatan qonuniy chora ko‘rishni so‘ragan.
Mazkur arizaga asosan, 1-iyul kuni O‘zbekiston IIV JQBB Korrupsiya va iqtisodiy jinoyatlarga qarshi kurashish boshqarmasi hamda Bosh prokuratura huzuridagi Iqtisodiy jinoyatlarga qarshi kurashish departamenti Toshkent viloyati boshqarmasi xodimlari hamkorligida o‘tkazilgan tezkor tadbir davomida Sh.S. Toshkent viloyati, Bo‘stonliq tumani, Ugom olma bog‘i ko‘chasi 82-uyda joylashgan dala hovlida ariza muallifidan 20 000 AQSH dollarini olgan vaqtda ashyoviy dalillar bilan ushlandi.
Mazkur holat yuzasidan shu kuni Bosh prokuratura huzuridagi Iqtisodiy jinoyatlarga qarshi kurashish departamenti Bo‘stonliq tumani bo‘limi tomonidan fuqaro Sh.S.ga nisbatan Jinoyat kodeksining 168-moddasi 4-qismi “a” bandi (juda ko‘p miqdorda sodir etilgan firibgarlik) va 28-, 211-moddasi 3-qismi “a” bandi (pora berish) bilan jinoyat ishi qo‘zg‘atilib, Jinoyat protsessual kodeksning 224-moddasi tartibida ushlangan.
Jinoyat ishi yuzasidan tergov harakatlari olib borilmoqda.
Bundan avval O‘zbekistonda endi noqonuniy qurilish va yerni o‘zboshimchalik bilan egallash to‘g‘risida Telegram-bot orqali xabar berish mumkinligi, Jizzax va Buxoroda yerlarni noqonuniy ravishda sotish holatlari aniqlangani hamda Qarshida hokimlik zaxirasida turgan bo‘sh yerni 70 mln so‘mga sotmoqchi bo‘lgan shaxs ushlangani haqida xabar berilgandi.
Izoh (0)