“O‘tgan yili kasallangan xodimlarimiz bu yilda ham qayta kasallanyapti” — Sherzod Shermatov

Xalq ta’limi vaziri Sherzod Shermatov vazirlikdagi ayrim xodimlari koronavirus bilan qayta kasallanganini ma’lum qildi.

“Vazirlikning markaziy apparatida ham, afsuski, kasallanish holatlari kuzatilmoqda. Eng yomoni, o‘tgan yili koronavirus infeksiyasi bilan kasallangan xodimlarimiz ham bu yilda ham ushbu kasallik bilan qayta kasallanyapti. Chunki 2020-yilda kasallanganida antitanalar yetarlicha shakllanmagan.

Fursatdan foydalanib qolgan barcha tizimimiz xodimlari, maktabdagi o‘qituvchilarimiz va xodimlarimizni tezroq vaksina olishlarini taklif qilib qolaman”, – deydi xalq ta’limi vaziri.

Mamlakatda kunlik kasallanish holatlari soni yana ortib bormoqda. Shu sababli respublika bo‘ylab 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.

2-iyulda Toshkent shahrida DXX tasarrufidagi “Yoshlik” sport majmuasida kovid-markaz qaytadan tashkil etildi. Bundan tashqari, 5-iyul, dushanba kuni “O‘zekspomarkaz”da ham koronavirusga chalingan bemorlarni qabul qilish markazi ochilishi ma’lum qilindi.