Toshkent shahar hokimligi, Ekologiya va atrof-muhitni muhofaza qilish davlat qo‘mitasi, Qurilish vazirligi, Madaniyat vazirligi, O‘rmon xo‘jaligi davlat qo‘mitasi, Transport vazirligi hamda O‘zEOAVMA hamkorligida OAV bilan ochiq muloqot tashkil etildi. Bu haqda poytaxt hokimligi axborot xizmatiga asoslanib, “Gazeta.uz” xabar qildi.
Toshkentda obodonlashtirish va ko‘kalamzorlashtirish, manzarali daraxtlar va gullarni ekish, yashil hududlarni muhofaza qilish va kengaytirish ishlari tizimli ravishda olib borilayotgani ta’kidlandi. Poytaxtda 22 ta bog‘, 15 ta rekreatsion hudud, 20 ta sayilgoh, 130 kilometrdan ortiq piyodalar va 100 kilometrga yaqin velosiped yo‘laklari mavjud.
Poytaxtdagi hayot sifatini oshirish uchun 2023-yilga qadar yashil hududlar ko‘lamini 30 foizgacha kengaytirish rejalashtirilgan.
Bundan tashqari, prezident topshirig‘iga muvofiq, 2021−2022-yillarda poytaxtning 524 ta mahallasida yashil hududlarni sug‘orish uchun 1500 ta quduqni burg‘ilash, 130 kilometr piyodalar va 117 kilometr velosiped yo‘laklarini qurish, 12 ta bog‘, 25 ta yashil hudud va saylgohlarni tashkil qilishga qaratilgan maqsadli dasturlar ishlab chiqiladi va amalga oshiriladi.
Toshkent shahrida umumiy 140 gektar maydonga ega bo‘lgan attraksionlarsiz bog‘larni va har bir tumanda kichik yashil bog‘larni tashkil qilish rejalashtirilgan.
“Loyihalarni ishlab chiqish va amalga oshirish jarayonida aholi fikri va takliflari inobatga olinadi”, — deyiladi xabarda.
Izoh (0)