Joriy yilning 2-iyul kuni Tadbirkorlar va ishbilarmonlar harakati — O‘zbekiston Liberal-demokratik partiyasi siyosiy kengashi ijroiya qo‘mitasining navbatdagi majlisi bo‘lib o‘tdi. Unda bugungi kunda partiya oldida turgan bir qator muhim masalalar muhokama qilindi.
Ta’kidlandiki, mamlakatimizda keyingi besh yilda barcha sohalarda chuqur islohotlar amalga oshirilmoqda. Bu jarayon davom etayotgan bo‘lib, O‘zbekiston yangi uyg‘onish davri, uchinchi Renessansga qadam qo‘ymoqda.
Mislsiz yangilanishlar jarayoni siyosiy partiyalardan ham yanada faollikni oshirishni, o‘z faoliyatini bugungi talablar darajasidan kelib qayta ko‘rib chiqishni talab etmoqda. Mana shunday talablardan o‘laroq O‘zLiDeP xalq bilan bevosita muloqot tamoyilini o‘z faoliyatiga keng joriy etmoqda. Bular tadbirkorlar, fermerlar va aholining turli qatlam vakillari bilan amalga oshirilayotgan doimiy uchrashuvlar, ularning faoliyatiga to‘siq bo‘layotgan omillarni o‘z vaqtida aniqlash va hal qilishga qaratilgan harakatlarda o‘z aksini topmoqda.
Partiya aholi bilan muloqotlarda butunlay yangicha, jonli va xalqchil usullardan foydalanmoqda. Partiya rahbariyati va faollarining, deputatlik korpusi vakillarining aksariyat vaqtini joylarda, aholi orasida o‘tkazishga harakat qilayotgani ham partiyaning imkon qadar xalq bilan birga bo‘lish, uni o‘ylantirayotgan masalalar ichida bo‘lishga intilayotganidan dalolat beradi. Partiya tuzilmalarida aholi murojaatlari, shikoyatlari bilan ishlash tizimi yo‘lga qo‘yilgani, aholi bilan bevosita ishlash borasida amalga oshirilayotgan muhim ishlardan biri bo‘ldi.
Partiya tomonidan parlamentdagi o‘z fraksiyasi orqali mamlakatda amalga oshirilayotgan islohotlarning qonunchilik asoslarini takomillashtirish borasida amalga oshirilayotgan ishlarda ham mutlaqo o‘zgacha yondashuvlar joriy etilmoqda. Deputatlar tomonidan kiritilayotgan tashabbuslarning soni o‘tgan chaqiriqning shu davriga nisbatan ikki barobar oshganligi, ularning aksariyati aynan bugun aholini o‘ylantirayotgan masalalar yechimiga qaratilganligi shundan dalolat beradi.
Mahalliy kengashlardagi deputatlik guruhlari orqali joylarda qonunlar va davlat dasturlari ijrosi ustidan qat’iy nazoratni yo‘lga qo‘yishga bo‘lgan intilish, bu borada sessiyalarga kiritilayotgan masalalar, deputatlik so‘rovlari sonining keskin oshganligida ham o‘z ifodasini topmoqda. Xususan, 2015—2016-yil 6 oyi hamda 2020—2021-yil 6 oyi davomida eshituvlar soni 1600 dan 3100 taga, sessiyaga kiritilgan masalalar soni 700 tadan 1800 taga, sessiyada qabul qilingan qarorlar soni 500 tadan 1400 taga va deputatlik so‘rovlari soni 6 mingdan 21 mingtaga yetdi.
Buni keyingi vaqtda O‘zLiDeP o‘z faoliyatini mutlaqo qayta ko‘rib chiqish, uni maksimal darajada xalq manfaatlaridan kelib chiqib va unga yaqin bo‘lgan holda, amalga oshirish yo‘lida amalga oshirayotgan sa’y-harakatlarining samarasi sifatida baholash mumkin.
Partiyani aholi dardlariga yaqin siyosiy tuzilma sifatida rebrending qilish borasida amalga oshirilgan ushbu ishlarning birinchi bosqichi yakuni bugungi kunga kelib, O‘zLiDeP’ga bo‘lgan ishonch, aholi tomonidan uning g‘oyalarini qo‘llab-quvvatlovchilar soni izchil oshib borayotganida o‘z aksini topmoqda.
Xususan, keyingi uch yil ichida partiya a’zolari soni 400 mingdan 1 millionga yetganligi va tinimsiz osha borayotganligi, boshlang‘ich partiya tashkilotlari soni 13500 dan oshganligi bugun partiya saflarida turib, mamlakatda amalga oshirilayotgan islohotlarda faol qatnashish istagida bo‘lganlar soni oshib borayotganligining yaqqol dalilidir.
Mana shunday bir davrda O‘zLiDeP partiya rebrendingida yangi bir qadamni amalga oshirishga kirishmoqda. Qayd etish kerakki, partiya rebrendingi, uning o‘zgarayotganligi to‘g‘risida gap ketganda, albatta, nafaqat g‘oyalari, faoliyati, balki asosiy ramzi (logotip)ga to‘xtalmaslik mumkin emas. Partiya faoliyatidagi o‘zgarishlar, albatta, uning timsoli bo‘lgan — logotipida ham aks etishini davrning o‘zi taqozo etmoqda.
Keyingi uch oy davomida aholi bilan bo‘lgan turli uchrashuvlar, muloqotlarda ham ushbu masala yuzasidan jamoatchilikning fikri o‘rganib borildi. Partiya faollari, keng jamoatchilikning fikr-mulohazalaridan so‘ng shu ma’lum bo‘ldiki, bugungi talablar darajasiga mos ravishda o‘zgarish O‘zLiDeP’ning logotipida ham o‘z aksini topishi kerak. Boshqacha aytganda, partiyaning yangi logotipi O‘zLiDeP islohotlarning yangi bosqichida o‘z oldiga qo‘yayotgan ulkan maqsadlarni o‘zida to‘la aks ettira oladigan logotip sifatida gavdalanishi zarur. Toki butun xalq va xalqaro jamoatchilik ushbu ramzda O‘zLiDeP’ning bugungi kunda, o‘z oldiga qo‘ygan maqsadlarining aksini ko‘ra olsin.
Masala atrofida bo‘lib o‘tgan munozaralardan keyin ushbu maqsad va vazifalarni amalga oshirish maqsadida tegishli ishchi guruhni shakllantirish to‘g‘risida fikrlar ko‘rib chiqildi. Ushbu masalani partiya siyosiy kengashiga kiritgungacha bo‘lgan davrda, logotip bo‘yicha partiya a’zolari va aholi vakillari fikrlarini o‘rganish uchun barcha viloyatlarda muhokamalarni tashkil qilish lozimligi ko‘rsatib o‘tildi. Yangi logotip imkon qadar ko‘proq aholi vakillari va partiya a’zolari fikrlarini o‘zida qamrab olgan haqiqiy, xalqchil logotip sifatida shakllanishiga erishish zarurligi ta’kidlandi.
Masalaning muhimligi va partiya uchun ahamiyatidan kelib chiqqan holda, uni partiya siyosiy kengashining keyingi majlisida ko‘rib chiqish va ushbu yig‘ilishni iyul oyining birinchi dekadasida, Toshkent shahrida o‘tkazish to‘g‘risida fikrlar bildirildi.
Ko‘rib chiqilgan barcha masalalar yuzasidan partiya ijroiya qo‘mitasining tegishli qarorlari qabul qilindi.
O‘zLiDeP matbuot xizmati